Propuestong drug test sa Sr. HS, iginilid

July 5, 2018

 

Iginilid kan Departamento de Edukasyon (DepEd) Bikol an propuesto kan City School Division sa Ciudad nin Naga na dapat antes magpalista an mga estudiante na malaog sa Senior High School kinakaipuhan magpa drug test muna.
 
Ini nganing an mga joven pang estudientes maglikay sa ano man na paggamit nin ilegal na droga huli ta pueding maapektaran an saindang pagklase sagcod na dai na akoon sa Senior H/S.

Si Dr. William Gando, DepEd Supt kan City School Division sa Naga nagsabi iyo ini an saiyang katuyohan nganing mismo an mga estudiante amay pa saindang atid-atidon na dai na magprobar na mag-usar nin droga.

An planong ini saiyang pigsumiter sa saindang opisina rehiyonal sa Ciudad nin Legaspi alagad dai preparado na iindorso sa DepEd Central Office. Kun na aprobaran an saiyang kahurotan an ibang policia sa edukasyon kan ahencia ma-aapektar na dapat gabos na mga kaakian magtapos sa pag-escuela.

Sa report kan Philippine National Police asin Philippine Drug Enforcement Agency igwa nang nagkakadarakop na menor de edad na envuelto sa droga. Digdi mahurop-hurop  an estudiante nganing magpadagos sa pagklase dai mag-usar ilegal na droga, sabi pa.

An PDEA nagrerecomendar sa DepEd na dapat poon pa sana sa Grade IV ipa-drug test na mantang pa-joven na ngonian an nagiging envuelto sa droga.

An DepEd asin mga Parent Teachers Federation isinisikwal an propuesto kan PDEA, alagad sinabi pa ni Gando na dapat mag-olay an DepEd asin PDEA kun arin an mas pueding iconsiderar defende sa saindang programa.

Sinabi pa kan DepEd Naga na igwa na sindang ginigibong campanya laban sa droga na poon pa sana sa elementarya pigpapaliwanag an negatibong epekto sa salud an paggamit nin droga.

Afuera pa kaini, nagkakaigwa pa sinda nin random drug test sa mga empleados asin paratukdo asin ini nagsikad na kan nakaaging semana asin mapadagos pa sa maabot na mga aldaw bilang suporta ninda sa paglaban kan gobierno sa ilegal na droga.

Dai man sinabi kan pamayo kan DepEd Naga kun igwa nang nagpositibo sa droga alagad kun igwa maagi pa sa confirmatory test kan Departamento de Edukasyon.               (DPA)


 

Share on Facebook
Share on Twitter
Please reload