Suspendidong acting mayor igwa pang mga kadamay sa caso kriminal

July 5, 2018

 

Libmanan, Camarines Sur – Bako lang an suspendidong  Acting Mayor Rommel Bulaong an nag-aatubang nin nagkaperang mga casong falsification of public documents asin malversation envez duwa pang opisyales lokal kabale an apat pang iba na mayo na sa puesto asin an saro na sentenciahan na kan corte.

Si dating Consejal Jose ‘Nonoy’ Dy, pamayo kan Citizens Crime Watch (CCW) sa Camarines Sur na iyo an nagsangat kan mga caso nagpahayag na base sa records kan caso sa corte an mga incumbent officials kinababalihan ninda Acting Vice Mayor Jerry Tendero asin suspendidong alcalde Bernard Brioso.

An iba pa na mayo na sa puesto iyo sinda dating consejales Rodel Rasonable, Jose Antonio Dilanco, Vicente Chavez, asin Luis Cañete mantang si Reynaldo Abay nasentenciahan  na nin anom na taon asin sarong bulan matapos mag-pledged guilty sa corte sa pitong casong falsification asin limang casong malversation. An dating kagawad nagpasa-irarum sa probation.

Sinabi ni Dy na sa caso si Bulaong na narecibe na an kopya kan decision kan corte sa tolong bulan na preventive suspension  binaba kan Hunyo 22, 2018 ni Juez Manuel Salumbides kan RTC Branch 56 kan Hall of Justice sa Libmanan, CSur, nag-aatubang siya nin tolong casong malversation asin anom na falsification of public documents.

An suspension inako na kan acting mayor asin nagribay sa saiya si Acting Vice Mayor Alexander Mendoza na iyo na ngonian an Acting Mayor.

Si Bulaong nagpahayag sa media na ‘’open heart’’ na niyang inako an suspension huli ta mas marhay man magdalagan na an caso nganing malinawan an mga acusasyon laban sa saiya.

An iba pang nag-aatubang nin caso kriminal iyo sinda Rasonable may walong casong falsification of public documents asin limang malversation; Tendero – duwang casong falsification asin sarong malversation; Chavez – duwang falsification asin sarong malversation; Brioso – tolong casong falsification asin duwang malversation; Canete – apat na falsification asin duwang malversation; asin Dilanco – duwang falsification asin sarong malversation.

An sinambit na mga caso yaon sa sala ni Juez Irma Isidora Boncodin- Zamudio kan RTC Branch 57.

Sinabi ni Dy naging ugat kan caso matapos saiyang madiscobre base sa records na saiyang nasukit pig-feke soboot si mga opisyal na recibo kan Philippine Councilors League Seminar na ginibo sa Boracay asin igwa pa sa ibang lugar alagad dai man nag-aratendir asin nagpa-reimbursar sa lokal na gobierno kan saindang soboot mga binayadan.

An caso enot sinangat sa Ombudsman alagad binasura si mga caso administrativo asin ipinasa sa RTC si mga caso kriminal.



 

Share on Facebook
Share on Twitter
Please reload