Pagdakit kan mga poste kan Casureco II, sa atol

July 12, 2018

 

Mapaso na an joint circular kan Department of Energy (DoE) asin Department of Public Works and Highways (DPWH) sa Hulyo 30, 2018 sa pagdakit kan mga electrical posts kan mga cooperativa nin electricidad alagad sa Camarines Sur II Electric Cooperative (Casureco II) pigpuponan pa sana sa mga poste na namumugtak sa road right of way  kan national road sa Bombon asin Calabanga, Camarines Sur.

Nagprobar nang ponan sa Brgy. Peñafrancia asin Brgy. San Felipe sa Ciudad nin Naga, dai dinagos mantang an apektadong mga poste kun hahalion sa laog kan road right of way makakalaog sa pribadong propriedad.  Huli kaini an desisyon kan manijamiento magluwas muna sa ciudad, sabi ni Project Supervisor/Acting General Engr. Nelson Lalas.

Pigcierto kan PS/AGM na an saindang cuentada kan gabos na apektadong mga poste sa coverage area kan Casureco II cocompletohon nindang maisumiter sa National Electrification Administration (NEA) antes magabot an Hulyo 30.

An joint circular kan DoE asin DPWH dapat makasumiter sinda kan gabos na cuentada sa electrical posts na apektado kan road widening project hasta sa Hulyo 30. Saiyang piglinaw na an sarong taon na pigtaong plaso kan duwang ahencia bako na taposon an relokasyon envez dapat makasumiter sinda kan total na cantidad kan apektadong mga poste.

An sainda pa sanang naisusumiter sa NEA iyo an Milaor-Minalabac na nagcacantidad nin P5.5 milyon; Ciudad nin Naga nagcacantidad P16.8 asin saindang padagos na pigcuecuestion an cuentada kan DPWH na P9.2 milyon; Calabanga hasta sa Pili nagcacantidad nin P19  milyon alagad sa iba pang mga banwaan na sakop kan cooperativa dai paman maipaluwas ni Lalas kan makuanan nin entrevista kan Bicol Mail.

An Casureco II iyo an magibo kan cuentada sa relokasyon kan mga poste, isumiter sa NEA nganing aprobaran asin ipapasa sa second engineering district kan DPWH.

Kun maaprobaran kan NEA an cuentada kan cooperativa sa pagdakit kan mga poste dadarahon sa national office nganing aprobaran.

Mapuponan sana an pagdakit oras na maprobaran kan DPWH Central Office na iyo an ma-aprobar kan badget.

An sa atol na hiro kan manijamiento kan Casureco II na ma-implementar na an relokasyon kan mga electrical posts saro sa causa na magdesisyon an Sangguniang Panlungsod kan Ciudad nin Naga na magpasar nin resolucion nganing hagadon sa NEA na halion na sa puesto si Lalas bilang PS/AGM kan cooperativa.

An mga poste na yaon pa sa laog kan road right of way kan national road nagiging causa nin nagkapera nang aksidente sa trafico.

Mahiwas na an natapos na mga proyecto sa road widening project kan DPWH alagad abalahong an pagdakit kan mga poste particularmente sa Ciudad  nin Naga na ginatos na mga poste an ulang sa proyecto.

Sinabi man ni PS/AGM Lalas, an 2nd Engineering District kan obras publika sa Baras, Canaman, Camarines Sur iyo an may obligasyon mag-follow sa saindang opisina central kun aprobado na an pambayad sa sainda kan pagdakit kan mga poste.


 

Share on Facebook
Share on Twitter
Please reload