DENR nagbiklad nin mga kondisyon sa pagputol kahoy

Dawa nag-isyu na nin Special Tree Cutting Permit an DENR sa DPWH nganing saindang purotolon an mga puon nin kahoy na yaon sa laog kan road right of way na apektado kan pig-iimplementar na road widening project alagad dai tolos ini magiging madali sa ahencia mantang igwang mga pigtaong mga terms and conditions an DENR Bikol. Si Engr. Richard Ragragio kan 2nd Engineering District kan DPWH sa Baras, Canaman, Camarines Sur nagpahayag sa Bicol Mail na dawa igwa nang permit to cut sa 98 mga puon nin kahoy sa tertiary roads kan Naga-Carolina-Panicuason Road hasta sa San Felipe, gabos sa Ciudad nin Naga igwa pang proceso antes sindang magputol nin mga kahoy. Dapat i-monitor an mga pigtanum nganing ciertong nabubuhay asin kaipuhan igwang 80 por cientong survival rate. Estrictong pigsusugo na dapat cada sarong kahoy na pupotulon kaipuhan magtanum muna nin sangatos na seedling asin an DENR iyo an madesignar kun sain dapat magtanum karibayan kan puporutolon na poon nin kahoy. Antes kan cutting operations, kaipuhan igwang placards o signboard na igwang sukol na 4x8 na papatindogon bilang pagtaong informasyon sa publiko na sinda maputol nin mga kahoy, kun perang pupurotolon asin ibugtak na awtorisado na sinda kan DENR base sa pig-isyung permit. An permit kaipuhan magtalaan nin dialogue sa LGUs concerned, NGOs asin iba pang stakeholders sa lugar nganing saindang ipaliwanag an importancia kan saindang proyecto, pagribay kan mga puputolon na kahoy. Sinabi pa an gigibohon nindang tree cutting operations dapat igwang superbisyon an PENRO Camarines Sur o an saindang awtoridadong representante. Pakatapos kan cutting operations, an PENRO CamSur masumiter kan acomplisimiento kan total volume kan mga pinurotol asin an seedling replacement requirement kabale na an mapa kan lugar na pigtanuman. Si DENR Regional Director Oscar Dominguez iyo an nagpaluwas kan mga kondisyones na dapat estrictong sunodon kan DPWH . Sinabi pa ni ADE Ragragio an mga kondisyones na ini saro sa nakakaulangan sa implementasyon kan road widening project sa mga national road sa irarum kan build-build program kan Duterte administration alagad mayo sindang magiginibo magsunod sa mga reglamento. Sa ngonian padagos na an mga ginigibong road widening project kan DPWH sa San Felipe road alagad piglilihisan muna si mga kakahoyan sa road right of way mantang masunod muna sinda sa proceso sa pagputol kan mga ulang na kahoy, sabi pa ni Ragragio. (dpa)