PATANID SA MGA PULIS: Ilegal na sugal isikwal - Escobal

An Camp Simeon Ola sa liderato kan bagong regional director nagpaluwas nin patanid sa mga miembros kan Philippine National Police (PNP) sa Kabikolan na nongka maging envuelto sa ilegal na actividad asin maatubang nin disciplinary action an arin man na awtoridad na mapasaway. Si Chief Supt. Arnel Escobal, Acting Regional Director kan Bicol PNP nagpahayag sa miembros kan media na saro ini sa saiyang direktiva sa kapupulisan huli ta halangkaw na an saindang sueldo, dapat ibalik an tiwala sa sainda kan namamanuan. Iyo man ini an saiyang instruksyon sa mga provincial director na dapat masubaybayan an saindang mga kabado kun nagiging envuelto na sa ilegal na sugal mantang igwa man sisimbagan an opisyal kun dai nag-aaram sa mga nangyayari sa laog kan saindang organisasyon. An PNP iyo an nasasahotan na nagtataong proteksyon kun padagos na nagdadanay an ano man na ilegal na actividad sa sarong lugar o provincia. Amay nang nagpatanid si Escobal sa kapupulisan na dai magturog sa saindang mga Police Station huli ta maconducir siya nin surprisang inspkesyon ano man na oras nganing maaraman kun kompleto an mga nakadestinong pulis asin kun nagtatrabajo bilang mga awtoridad. Kabale pa sa tututokan kan saiyang liderato an higot na kampanya laban sa ilegal na droga. Sa isyu sa planong pag-okag nin mga provincial director asin iba pang opisyal kan Bikol PNP, sinabi ni Escobal na magdedefende sa trabajo o performance ninda kun siisay an dapat ribayan sa posisyon. An pagtukaw kan bagong jefe kan Bikol PNP piglalaoman maimplementar nin pagbabalasa sa masunod na mga semana mantang normal sa saindang organisasyon kun igwang bagong pamayo nabugtak man kan saindang sadiring dayupot na opisyal. Si Escobal na sarong abogado matapos makapasar sa bar examination kan 1998, tubong Nabua, Camarines Sur graduado sa Philippine Military Academy (PMA) ‘’Hinirang’’ Class 1987 asin an pinakahuring destino kaini bilang jefe kan Highway Patrol Group kan National Capital Region (NCR). Siya iyo an nagribay sa maritero nang Chief Supt. Antonio Gardiola sa ginibong turned over of command kan Lunes, Hulyo 9, 2018 na presente si PNP Chief Director General Oscar Albayalde.