SHFC katuwang kan City Hall sa housing program

July 19, 2018

 

An programa sa Urban Poor na dating pigponan kan panahon ni dipuntong Alcalde Jesse M. Robredo iyo ngonian an pigsisibotan kan lokal na gobierno kan Ciudad nin Naga asin saro ini sa pigtawan punto sa privilege speech ni Consejal Julian Lavadia sa sesyon regular kan Sangguniang Panlungsod kan Martes, Hulyo 17.

An Social Housing and Finance Corporation (SHFC) sarong ahencia de gobierno matabang sa lokal na gobierno kan Ciudad nin Naga nganing magkaigwa na nin sadiring harong an mga informal settler family (ISF) asin sa paagi nin resolucion kan Sangguniang Panlungsod tinawan awtorisasyon si Alcalde John Bongat nganing maglaog sa memorandum of understanding para sa housing program, sabi ni Lavadia.

Ginibo na an signing of memorandum of understanding  kasoodmang Miercules, Hulyo 18 sa Session Hall kan SP na presente an opisyales kan Social Housing and Finance Corporation sa pangenot kan saindang presidente, Atty. Arnolfo Ricardo kan  Cabling asin si Alcalde John Bongat na presente an mga miembros kan SP sa pamamayo ni Bise Alcalde Nelson Legacion.

An ciudad matabang sa pag-organisar kan mga ISF, sa lado nin manpower asin coordinasyon.

Si Lavadia, Chairman kan Committee on People Empowerment sa SP nagsabi na an SHFC igwang fondo sa paagi kan saindang Community Mortgage Program (CMP) nganing gastoson para sa pambakal nin lote asin pagpa-harong kan mga informal settler family sa ciudad.

 Sa lindong kan CMP, an mga ISF na residentes kan ciudad mabilog nin asosasyon na iyo an mahanap nin mahiwas na lote na babayadan kan SHFC asin para sa saindang ipapatindog na mga harong na gagastosan kan sinambit na ahencia.

An benipisyaryo pueding magbakal nin 40 hasta 70 metros cuadradong lote na pueding aboton nin labi sa P100 mil asin ini defende sa presyo kan mababakal na lote. An programa sa pagpaharong bakong libre envez babayadan nin utay-utay sa cantidad na P600 cada bulan.

Magigirumdoman sa privilege speech ni Lavadia sa sesyon regular kan SP kan nakaaging Agosto 22, 2017 saiyang pigtawan duon na dapat magkaigwa nin mas concretong programa an ciudad para sa housing masterplan nganing  marealisar an target na dapat gabos na familia sa ciudad may sadiri nang harong sa 2022.

Saiyang sinabi na aram niya an kamugtakan kan pagbuhay kan mga ISF o dating inaapod na eskuwater na parating nahahadit kun saen mabalyong estaran kun igwang demolition order.

Sa ngonian luway-luway nang napoponan kan ciudad afuera kan dati nang housing program sa urban poor asin yaon na an SHFC.

Afuera pa kaini, saiya pang pigbuyagyag na igwang alokasyon nin P150 milyon an National Housing Authority (NHA) para sa maabot sa 1,000 na mga familia na nawaran nin harong kan nakaaging bagyong ‘’Nina’’, alagad kaipuhan aprobaran muna kan National Disaster Risk Reduction Management Council.




 

Share on Facebook
Share on Twitter
Please reload