SONA ni Duterte sasabayan protesta kan transport sector

July 19, 2018

 

Sa  paagi   nin   protesta sabay sa gigibohon na State of the Nation Address (SONA) ni Presidente Duerte sa Hulyo 23, ipapaheling kan sektor nin transporte sa Bikol asin iba pang rehiyon na sinda nagkakasararo nganing ibiklad sa administrasyon Duterte na pusog nindang pigcocontra an  iimplementar na phaseout sa nag-eedad nang quince años nang  mga pigkakayod na  pampasajerong jeepney na tinatawan nalang sinda nin plaso sa laog nin walong bulan.

Nag-organisar an mga operator asin chofer nin jeepney na pigngaranan na No to Jeepney Phaseout, Camarines Sur asin igwa na kaini sa Albay asin iba pang provincias sa Kabikolan maging sa iba pang mga rehiyon huli ta rinibong operator asin chofer an apektado kun ipapadagos kan Land Transportation Franchising and Regulatory Board (LTFRB) an estrictong implementasyon kan jeepney modernization program.

Si Joel Pillogo, lider kan Condor- PISTON sa Camarines Sur  nagpahayag na sa ginibong forum kan mga jeepney operator asin driver sa Barangay  Hall kan Del Rosario, Ciudad nin Naga na naging bisita si George San Mateo, National President kan PISTON nagkasararo sinda na magbilog kan No to Jeepney Phaseout Coalition na an napili digding opisyal na parataram iyo si Mar Ravallo kan Libmanan Transport Cooperative.

Katuyohan kan grupo na ipaglaban ninda an diretso laban sa phase out dawa na ngani dai man sinda nagcocontra sa modernization program alagad kun hahalian sinda nin hanap buhay saindang ilalaban mantang dakul pang mga jeepney an nasa kondisyon pa an saindang makina alagad papalapaon sana.

Papabakalon kami nin abot sa P1.8 milyon na EJeep na dai man kaya kan mga operator mapapaboran sana digdi an mga darakulang capitalista, sabi pa ni Pillogo.

Bako lang sa halangkaw na presyo alagad halabaon an mga rekisitos antes makabakal an mamahalon na pampasajerong Ejeep, sabi pa.

Kun digdi lang sa Camarines Sur maabot sa 2,700 na mga jeepney an apektado asin 3,000 sa Albay asin rinibo pang pampasajerong jeepney hali sa Catanduanes, Camarines Norte, Masbate asin Sorsogon.

Nasa 97 por ciento kan mga operator an nag-atendir sa sinambit na forum hali sa limang congressional district kan Camarines Sur.

   Boot sabihon kaini dawa dai sinda nagkakasurondo kun may transport strike alagad kun sa lado nin phaseout isyu saindang ipaglalaban na dai ini mangyari.

Sa nakatalaan na SONA ni Duterte sa Hulyo 23 bako lang digdi sa Camarines Sur asin Bikol an malansar nin protesta envez maging sa manlaen-laen na rehiyon. Afuera pa kan isyung ini saindang ipapadagos an pagcontra sa TRAIN law na an apektado digdi iyo an pobreng namamanuan bako lang an reclamo ninda sa padagos na paglangkaw kan presyo sa produkto nin petrolyo.      

An mga progresibong                grupo nagsusuporta sa  pinalalaban kan sektor nin transporte mantang sinda nagkakasararo sa gigibohon na protesta.

Nakatalaan man magpaluwas nin sadiring version nin SONA an progresibong grupo sa isyu sa mga pangako na dai man na-iimplementar, pagdenuncia sa mga nangyayaring extra judicial killing, pagratak sa Mahal   na Dios na inapod niyang ‘‘Stupid’’ asin iba pang mga pig-andaman nindang listahan na kaipuhan maaraman kan namamanuan an isyu laban sa administrasyon Duterte.                  




 

Share on Facebook
Share on Twitter
Please reload