DARA NI VP LENI HALI SA USA

July 26, 2018

 

Medical equipment dai inako kan Capitolyo

Yaon na an pighahalat na mga medical equipment hali sa Estado Unidos para sa Infirmary Hospital kan Calabanga, Camarines Sur asin preparado na kutang ipasa ni Bise Presidente Leni G. Robredo sa Capitolyo Provincial alagad namundo an bise presidente matapos informaran siya na dai pa aakoon kan provincia an saiyang na-solicit na mga kagamitan sa hospital asin nagtutubod siya na politica an dahilan na kaini.

Pigtalaan kan Viernes, Hulyo 20 an turn over matapos mag-abot sa Filipinas an mga medical equipment na saiyang nahagad sa ANCOP Foundation Inc. sa Estados Unidos apesar na aram kan Capitolyo Provincial sa ginibo nindang Technical Working Group meeting kan Noviembre 17, 2017 na presente si Gobernador Migz Villafuerte asin iba pang miembros kan TWG kan saindang mga kanya-kanyang assignment kan cada ahencia ngani sanang maging operational an hospital.

Si Robredo nag-atubang sa press conference kan nakaaging semana nganing ipaliwanag kaini an saiyang programa sa Omasenso sa Kabuhayan alagad kabalae sa nahapot saiya si pangakong mga hospital equipment.

An simbag kan bise presidente ‘’Yaon na si medical equipment dapat i-turn over ngonian na, nag-abot si equipment yaon na si ma-donar na ANCOP Foundation Inc, hali pa sa USA na pigrepresentaran ni Roger Santos, executive officer kan foundation.  Alagad pig-informed kita kan provincia na dai pa ninda aakoon si equipment asin aram ko pigpadara palang si surat ngonian na aga’’.

Namundo an bise presidente huli ta an apektado kun padagos na ma-aabala an operasyon kan infirmary hospital iyo an residentes kan banwaan nin Calabanga, saiya pang pig-osipon na nakakahinanakit an arog kaining nangyayari sa sinambit na banwaan ta igwa pang naghahanap na mga diferencia sa proyecto na taohan kan Malacañan asin naheheling niya na igwa nang motivo political.

MGA OBLIGASYON KAN MIEMBROS
KAN TWG  

Si Robredo iyo an pamayo kan TWG nagpaapod nin orolay kan Noviembre 17, 2017 na nagkasurondo an mga miembros kan saindang kanya-kanyang assignment, si Diputado Gabby Bordado iyo an mapagibo kan access road, si Gob Villafuerte nagsabi asin nagpangako na preparado an Capitolyo kan saindang P12-M na fondo para sa personajes kan hospital cada taon, afuera pa kaini iyo pa an magastos para sa pagpa-tiles kan salog.

Kabale pa sa TWG iyo an DOH iyo an masuplay nin mga laboratoryo asin iba pang facilidades mantang nagcierto an ahencia na matao pa nin dagdag na fondo na nagcacantidaad nin P5.5–M. Si Alcalde Ed Severo kan Calabanga an saiyang pigpangakong tabang iyo an pagpatakod nin linya kan tubig hali sa Calabanga Water District.

Sa sinambit na miting presente si City Health Officer Vito Borja kan Ciudad nin Naga na nagpaliwanag kun panong nagpuon an operasyon kan City Hospital nganing matawan ideya an LGU Calabanga.

An bise presidente naghagad nin listahan sa DOH Bikol kan mga kaipuhan sa Infirmary Hospital na iyo niya an pigsunod na hahagadon sa sarong foundation sa US asin nakua na an mga maninigong medical equipment alagad dai pigrecibe kan Capitolto.

An mga kagamitan pigpasaray muna ni Robredo sa bodega asin siya an mabayad sa arkila bakong hali sa fondo kan Opisina kan Bise Presidente.

Masupog sa nag-donar mararaya arog pa kaini an nangyari, sabi pa.
                                                                     
DAHILAN KAN CAPITOLYO

Si Provincial Administrator Angel Naval iyo an nagsurat sa bise presidente kun tano ta dai pa ninda aakoon an mga medical equipment huli sa mga dahilan na mayo pa nin suplay nin corriente an infirmary hospital, mayo pang access road, mayo pang hospital waste disposal asin iba pang rason.

Si dating Presidente Noynoy Aquino iyo an nagpangako kan hospital sa Calabanga alagad kan si VP Robredo iyo pa kaidto an Congresswoman kan tercer distrito iyo an nag-follow kan proyecto nganing marealisar na alagad nagkaigwa pang pagkaabala huli ta dai tolos pinaluwas kan DOH si fondo sa construksyon kan edificio.

Dinagdag pa kan VP na saiyang na-iintindihan an limitasyon kan provincia mantang sinda an masueldo kan mga personajes alagad kun hehelingon sa minutes sa ginibong TWG meeting ‘’very helpful and cooperative si Gob Migz. Si kaya niyang sagoton pigcierto na itatao. As I said baka si refusal na akoon si mga gamit o equipment igwang dahilan, pero an punto ko din yaon na si gamit ano man an raot na recibohon yan lalong lalo na napag-olayan yan asin an kawaran gamit nakakasagabal sa pagpoon sa operasyon kan hospital’             

Sa Calabanga, Camarines Sur, si Consejal Levi Sta Ana nagpahayag sa media na siya namumundo kan pangyayari apesar na yaon na an pighahalat na medical equipment alagad habo pang recibihon.

An apektado kaini iyo an saindang residentes, nagtabang na an bise presidente alagad igwa pang naghanap na diferencia ta taohan kan Malacañan.                                                                    (DPA)




 

Share on Facebook
Share on Twitter
Please reload