Ibang opisina kan City Hall idadakit sa Almeda Highway

July 26, 2018

 

An lokal na gobierno kan Ciudad nin Naga nagdesisyon na dai na maconstruhir nin ano man na dugang na estractura sa laog kan lote kan City Hall maging iginilid na an ano man na rehabilitasyon kan edificio envez pig-aandaman na an pagpaconstruhir nin mga  edificio sa lote kan ciudad sa Almeda Highway sa Concepcion Grande na babalyohan kan ibang departamento.
 
Saro sa mayor na dahilan iyo an naging desisyon kan sarong division kan Corte Suprema na pinapabayad nin P255 milyones na arkila an City Hall kan familia Mariano alagad an isyung ini saindang pigcuestion sagcod na nagsangat nin motion for reconsideration.

Si Alcalde John Bongat nagpahayag  sa pinaapod na press conference mantang igwa na sindang mga nakatagamang fondo para sa icoconstruhir na edificio na kinababalihan kan Command Center na nagcacantidad nin P10 milyones, City College of Naga igwa nang alokasyon na P28 milyones asin an P7M kaini kukuanon sa surplus kan ciudad.

Si nakatalaan na edificio para sa Physical Rehabilitation Center (PRC) na nagcacantidad nin P2-M na ibubugtak kuta harani sa City Health Office (CHO), Dangerous Drug Board Care Center Facilities nagcacantidad nin P5-M asin City Health Office II nagcacantidad nin P10-M.

An PRC Bldg. marerealisar sa paagi kan ordinansa na pigpadrenohan ni Consejal Sonny Rañola, pamayo kan Committee on Health sa Sanggunian Panlungsod kan ciudad.

Kabale pa sa ipapatindog sa Almeda Highway iyo an Evacuation Center na igwang cantidad P50-M alagad an fondo hali sa gobierno nasyonal.

An Convention Center na kaipuhan an dakulang fondo kabale na sa mga proyecto sa infrastractura kan ciudad.

Sinabi pa kan jefe ejecutivo an ground breaking ceremony sa icoconstruhir na mga edificio pigtalaan sa Hulyo 27, 2018.

Sa kaparejong press conference, pigbuyagyag ni Bongat an mga lugar na dating piglalantopan nin tubig baha alagad sa ngonian mayo nang problema sa mga pagbaha huli kan mga natapos na drainage project arog kan mga lugar kan Hernandez Avenue, dating Igualdad St., Isarog Avenue. Barlin, tinampo sa may Adventist Church asin iba pang barangay.

Kabale pa sa mga proyecto sa infrastrctura iyo an pagpabugtak kan City Hall nin covered court sa gabos na mga escuelas publika sa ciudad.                                                                                  (dpa)


 

Share on Facebook
Share on Twitter
Please reload