P127M fondo kan MNWD sa STP

July 26, 2018

 

Pig-aandam na kan Metropolitan Naga Water District (MNWD) an construksyon kan P127 milyones na Septage Treatment Plant (STP)  asin iba pang facilidad na  ibubugtak  sa 1.5 hektaryang lote sa anom na hektaryang daga kan water district sa Sitio Caromatig, Brgy. Carolina, Ciudad nin Naga.

Inutang sa Local Water Utilities Administration (LWUA) an fondo na dapat bayaran sa laog nin quinceng taon asin nakatalaan nang isubasta an proyecto nganing maimplementar ngonian na taon mantang magiging operational an planta nurong taon,  sabi ni Acting General Manager Engr. Virgilio Luansing.

An Septage Treatment Facility (STF) igwa nang naconstruhir na edificio para sa saindang oficina, motor pole, access road asin iba pang facilidad na pigponan apat nang taon an nakaagi alagad isusunod na an planta.

Sinabi ni AGM Launsing an Clean Water Act of 2004 nagmamando sa gabos na Local Government Units asin Water Districts na iimplementar an septage management program sa gabos na lugar na mayong piped sewerage systems.

An sinambit na ley nagsusugo na magsopsop kan mga poso negro sa mga residencia maging industrial cada limang taon.  

Mabakal nin vacuum truck na nagcacantidad nin P9 milyones an MNWD nganing gamiton sa pagsopson nin ati hali sa poso nego nganing ibagsak sa Septage Treatment Plant.

Sa Ciudad nin Naga, sa ngonian an MNWD iyo an uninong acredidatong ahencia na pueding apodan para sa pagpapasopsop kan septic tank oras na maging operational an planta na posibleng marealisar sa masunod na taon.

An MNWD nagpoon nang magsingil nin cantidad P1.53 cada metro cubico poon kan Hulyo 2, 2018 sa cada bulan na consumo sa tubig asin ini inaapod na Septage Sanitation Fee na sa laog nin limang taon dapat dai magsobra sa P2,245.10 cada residencia.

Piglinaw kan manijamiento na an pagsingil kan sinambit na cantidad base sa LWUA Board of Trustees Resolution No. 64 series of 2017.

Sinda igwa nang maabot sa cincuenta mil na residential asin industrial consumers hali sa coverage area kaini sa Ciudad nin Naga asin sa mga pagtaraig na banwaan kan Magarao, Gainza, Camaligan asin Canaman.                    (dpa)


 

Share on Facebook
Share on Twitter
Please reload