Pangiturogan sa waste-to-energy facility harani na

July 26, 2018

 

Piglalaoman na marerealisar man giraray an waste-to-energy facility (WEF) na haloy nang pangiturogan kan City Hall sa pamamayo ni Alcalde John Bongat kasunod kan pagkakalusot na sa Sanggunian Panlungsod kan ordinansa na kun maconvertir kan basura sa enerhia  kaipuhan digdi an Thermal Incineration Technology.

Sa sesyon regular kan SP kan nakaaging Martes naging joint and collective an motion na pigtulod ni Consejal Salvador Del Castillo, pamayo kan Committee on Environment nganing marealisar na sa Ciudad nin Naga an bagong teknologiya sa conversion kan basura na maproducir nin enerhia.

Si Alcalde Bongat, sa premiro pa sana kaining termino kan taon 2010 pigmamawot na an waste-to-energy facility alagad nagpalyar si proyecto sa paagi kan C. G. Global Corporation asin ngonian liwat binuhay kan ciudad.

An SP sa pamamayo ni Bise Alcalde Nelson Legacion asin saiyang pag-iriba nagdesisyon na maggibo na sinda nin aksyon nganing madagos na an proyecto mantang haloy na ining pangiturogan kan City Hall sa pamamayo ni Bongat.

Sa ngonian pigpuponan na an proyecto sa Sanitary Land Fill sa Barangay San Isidro alagad limitado sana an buhay kaini sagcod sa limang taon kaya decidido an lokal na gobierno na marealisar an pangiturogan kan opisyales lokal digdi na ma-implementar na an WEF.

Nagtutubod an jefe ejecutivo na an WEF iyo an maresolber sa problema sa basura sa ciudad asin makakaproducir pa nin enerhia na babakalon kan cooperativa nin electricidad asin puede pang magbarato an tarifa nin corriente digdi.

Sinabi ni Engr. Joel Martin, pamayo kan Solid Waste Management Office sa aroaldaw na koleksyon nin basura inaabot ini nin labi sa noventa tonelada asin sa maabot na mga taon madugang na ini mientras nagdadakul man an mga establisimiento sa Naga.

Sa pag-aadal sa teknologiya an WET naglalawig nin sobra sa treinta taon kumpara sa Sanitary Land Fill na limitado sana sa limang taon.

An City Hall bukas sa arin man na interesadong proponente na magsumiter kan saiyang propuesto sa WET mantang magkakaigwa pa ini nin mga terms and condition entre kan ciudad asin kan arin man na korporasyon alagad maagi pa sa proceso sa subasta.                                                                      (dpa)

 

Share on Facebook
Share on Twitter
Please reload