Soldados na dating NPA, binadil gadan

July 26, 2018

 

Dating rebeldeng New People’s Army na nagsuko sa militar sagcod na nag-training nganing maging miembro kan 9th Infantry Division kan Philippine Army, binadil gadan kan pigtutubodan dati man sana kaining kaibanan sa CPP/NPA.

Si Col. Paul Regencia kan 9ID ID na may base sa Camp Elias Angeles, San Jose, Pili, Camarines Sur nagtutubod na rebeldeng NPA an responsable sa panghihipa sa saindang kaibanan na soldados na pigngaran na si PFC Jhonny Franco, 31 años na destino sa Military Intelligence Batallion.

An insidente nangyari sa Barangay Veneracion, Pamplona, Camarines Sur kan nakaaging Juevez binadil kan tolong armadong kalalakihan.

Sa investigasyon kan Municipal Police Station kan Pamplona, Camarines Sur an biktima lunad sa motorsiklo na dai palang nahahaloy hali sa saindang residencia asin igwa nang nagmamasid kan saiyang hiro-hiro sagcod na dagos nang pinaputokan nin nagkaperang veces kan pigtutubodan na kalibre 45 badil.

An residentes kan barangay nabigla sana kan sunod-sunod na putok kan saindang maheling na sana na nagkakarigos na sa sadiring dugo an biktimang soldados.

Tolos man naglansar nin operasyon an mga soldados kan gobierno alagad dai na ninda inabotan an armadong grupo.

Parejo an pagtubod kan Philippine Army asin MPS Pamplona na armadong NPA an responsable sa sinambit na krimen alagad nagcoconducir man giraray nin investigasyon kan iba pang posibleng motivo afuera kan enot na suspechado.

Nagkapera nang caso sa mga dating nagsukong rebeldeng NPA an piglilikidar man sana kan dati nindang kaibanan sa kumunistang grupo.





 

Share on Facebook
Share on Twitter
Please reload