AGM Lalas, Masongsong pinaapod sa Malacañan

Pinaapod na kan Presidential Anti-Corruption Commission (PACC) sa Malacanan si Project Supervisor/Acting General Manager Engr. Nelson Lalas kan Camarines Sur II Electric Cooperative (Casureco II) asin si Administrator Edgardo Masongsong kan National Electrification Administration (NEA) nganing hagadan nin paliwanag ta sagcod sa ngonian dai pa na-iimplementar an pagdakit kan mga electrical post kan cooperativa. Si Director Angelino Cornelio Jr. kan Casureco II nagkumfirmar sa Bicol Mail na igwang surat si PACC Chairman Dante Jimenez na dapat kasoodmang Miercules, Hulyo 25, 2018 mag-report sa Malacañan sinda Lalas asin kabale si Masongsong tanganing ipaliwanag an sa atol na hiro sa pagdakit kan mga electrical post na apektado kan road widening project kan Department of Public Works and Highways (DPWH). Sa masunod na board meeting kan cooperativa nin electricidad, sinabi ni Cornelio saindang hahagadan nin report an PS/AGM kun ano an saindang resulta sa paghampang sa PACC. Enot nang natutuyawan ni Presidential Adviser for Bicol Affairs, dating Juez Marvel Clavecilla an Casureco II sa atrasadong implementasyon kan pagdakit kan mga poste sagcod na pinatanidan na kun mayong gibohon na aksyon dapat i-recall na kan NEA si Lalas. Alagad sa ngonian naglaog na sa isyu sa poste an PACC mala ngani pinaapod na siya sa Malacañan, sabi pa kan director. Igwa sanang sarong taon na plaso an Department of Energy asin DPWH base sa saindang memorandum circular na dapat taposon an pagdakit kan mga electrical post kan mga cooperativa nin electricidad hasta sa Hulyo 30, 2018. Kun dai ini masusunod an cooperativa nin electricidad iyo na an mapasan kan gabos na gastos sa pagdakit kan mga poste envez kan DPWH. Sinabi man ni Lalas, na saiya nang pigsumiter sa NEA si cuentada kan gagaston sa pagdakit kan mga poste asin an sinambit na ahencia iyo an ma-indorsar sa DPWH Central Office nganing tagamahan nin fondo. Mahiwas na an mga tinampo sa coverage area kan Casureco II na natapos na si road widening project kan DPWH alagad an mga poste na delicado sa mga aksidente sa trafico dai pa hinahale.