Andaya bagong majority floor leader sa Camara-Baja

August 2, 2018

 

An congresista kan primer distrito kan Camarines Sur, Abogado Rolando Andaya Jr. iyo na an bagong majority floor leader sa Camara-Baja kasunod kan ginibong pag-okag nin mga committee chairmanship sa bagong liderato ni House Speaker Gloria Macapagal-Arroyo.

Enot nang sinayumahan kan congresista an pagpugol kan sinambit na posisyon alagad dai na siya nakasayuma kan si House Speaker Arroyo iyo an naghagad na dapat an congresista kan Camarines Sur iyo an magribay na bagong  majority floor leader karibayan ni Congresista Rodolfo Fariñas kan Ilocos Norte.

Afuera pa kaini, siya pa an pigborotohan kan mayoriang miembros na maging chairman kan Committee on rules.

Mayoria sa mga Bikolanong lehislador nagsuporta sa pagribayan nin liderato sa Camara-Baja nganing mapatalsik si dating House Speaker Pantaleon Alvarez na midmid na alipores ni Presidente  Rodrigo Duterte.

Sa limang congresista kan Camarines Sur kabale sa nagsuporta ki CGMA iyo sinda Salvio Fortuno kan ika-limang distrito, Noli Fuentebella kan ika-apat na distrito, LRay Villafuerte kan segundo distrito mantang si Gabriel H. Bordado Jr. kan tercer distrito dai nagparticipar sa borotohan.

An congresista kan tercer distrito kan Camarines Sur kabale  sa 24 mga congresista na miembros kan  minority  group. Saiyang sinabi na sa bagong liderato ni CGMA nagtutubod sinda na marerealisar an ‘’democratic process’’ sa camara bakong arog kan nagtalikod na dating House Speaker Alvarez na nagiging brasohan an proceso sa pagpalusot nin bill.

Sa liderato ni Arroyo, sinabi ni Andaya na magkakaigwa sinda nin legislative agenda nganing tawan nin prioridad si mga importanteng propuestong ley asin dai magiging fuersahan  na    magborotohan tolos envez tatawan buelo an mga congresista na na makaparticipar sa mahiwas na deliberasyon.

Si Andaya, ultimo nang termino bilang congresista mientras na an saiyang pig-aandaman ngonian iyo an pagcandidato bilang gobernador  sa  maabot  na pirilian  lokal  sa  Mayo  2019.                           (dpa)  


 

Share on Facebook
Share on Twitter
Please reload