Emergency drill pigmamando na sa manga establisimiento

August 2, 2018

 

Tanganing parating andam an mga pribado asin pampublikong institusyon sa ano man na emerhencia maging sa calamidad an Sangguniang Panlungsod kan Ciudad nin Naga nagpasar nin Emergency Drill Ordinance na aprobado na ni Alcalde John Bongat.

Si Consejal Joselito S.A. Del Rosario asin City Youth Councilor Allysia Mariefranz Rodriguez iyo an mga padreno kan ordinansa numerado 2018-040 na may titulong An ordinance strengthening the conduct of Emergency Drills in business establishments, educational institutions, public and private offices, barangays, and healthcare institutions in the City of Naga, setting guidelines and mechanism thereof, and revising for this purpose City Ordinance No. 92.-067.

Sa entrevista ki Del Rosario, sinabi kaini sa ngonian an nagpapadalagan sa pagconducir nin mga drills iyo an Bureau of Fire Protect (BFP) alagad sa ordinansang ini obligado na an BFP, Naga City Police Office, Barangay na nakakasakop kan establisimiento, Public Safety Office maging an City Disaster Risk Reduction Management Office (CDRRMO),  na tarabangan an aplicante nganing dai man sinda madificilan na magpa-aprobar kan saindang drill plan.

Si Del Rosario, antes napili bilang consejal nagpugol na pamayo kan  Public  Safety office na kaayon sa trabajo kaini an pagiging evaluator  sa mga escuelahan, hospital, bangko asin iba pang establisimiento saiyang natatandaan na nakakaherak sa mga nagcoconducir nin drill dai ninda na-papakarhay an papeles nganing pa-aprobaran.

Katuyohan pa kaini tanganing pahiwason an mga coordinasyon kan manlaen-laen na ahencia asin magkaigwa nin cooperasyon nganing macierto an efectibong implementasyon kan ordinansa, sabi pa ni Del Rosario.

Kasoodma nagkaigwa nang inisyal na pag-oorolay kan preparatory drill committee na pinamayohan kan consejal na inatendiran kan mga representante hali sa NCPO, BFP, City Health Office, Bicol Medical Center, Ching Po Tong Fire Brigade, City Engineer’s  Office, PSO, CDRRMO, asin Naga City Community First Responders Program Office.

An ordinansa nagmamando sa mga envueltong establisimiento sa pribado asin sa gobierno na magconducir nin duwa sagcod sa apat na Natural Hazards Drill asin Human-induced Drill.  Kabale sa mga gigibohon na pag-ensayo iyo an evacuation or exit drill, rescue drill asin community drill.

An Chairman kan Oversight Committee on Emergency Drills iyo an pamayo kan Committee on Public Safety asin Peace and Order and Disaster Management kan Sanggunian Panlungsod. An mga miembros kinababalihan kan miembros kan SP, na kaayon sa Committee on Public  Safety,  Peace and Order and Disaster Management, SP Chairman kan Committee on Infrastructure asin City Planning and Development Coordinator.

Maatubang nin penalidad an mga kagsadiri nin establisimiento poon sa cantidad P2,000 hasta P5,000 asin puedeng mapriso nin anom na bulan, defende sa diskresyon kan corte kun magsisinutil sa ordinansa.                                                                                                                                     (dpa)





 

Share on Facebook
Share on Twitter
Please reload