Pagtapos sa edificio pinapahidale sa DOH

August 2, 2018

 

Hinagad na kan Presidential Anti-Corruption Commission (PACC) sa Department of Health (DOH) na magtao nang talaan kun nuarin matatapos an pigsasabing world class na bagong edificio kan Bicol Medical Center sa Ciudad nin Naga.

Nakakahinayang an proyecto kan gobierno na ginastosan nin bilyon peso, duwang taon nang abala asin an apektado digdi iyo an manga taga  Camarines Sur asin pagtaraid na provincia, sabi ni PACC Commissioner Miguelito Luna.

Sinabi pa na nag-orolay na sinda sa Malacanan asin an DOH asin hinahagad ninda kan PABA na magsumiter nin ‘’time line’’ an ahencia.

An aksyon sa abalang implementasyon kan proyecto dapat mag-imponer an DOH nin liquidation damages sa contractor o kun dai cancelaron an proyecto, alagad kun iimponer ini mas lalong desbentaje sa gobierno huli ta mas ma-aabala an pagtapos kan proyecto, segun sa PACC.

 Igwang criminal liability an administrasyon kan BMC huli kan saindang kapabayaan asin kabale na an contractor, alagad an iimponer na liquidation damages saro sa opsyon nganing maparikas an trabajo kan proyecto.

Naging cuestionable pa sa PACC na apesar mayo pang mga medical equipment an hospital alagad nagkaigwa nang inagurasyon na presente pa si DOH Secretary Francisco Duque.

Nabuyagyag pa na binago kan administrasyon kan BMC si desinyo asin plano sa bagong edificio kan hospital sagcod na nareparo ini kan Bureau of Fire Protection na iyo an nagiging dahilan na dai mag-isyu nin occupancy permit.

An P1.2 bilyones na tolong mga darakulang edificio kan BMC narealisar kan panahon ni Presidente Benigno Aquino III kan panahon ni Dr. Efren Nerva na iyo pa kaidto an nagtutukaw na director kan hospital.



 

Share on Facebook
Share on Twitter
Please reload