SA PABA, PACC: Magkatuwang vs kurapsyon, nagtuturog na mga proyecto

August 2, 2018

 

An Presidential Assistant for Bicol Affairs (PABA) asin Presidential Anti-Corruption Commission (PACC) magkatuwang sa campaña contra sa kurapsyon asin nag-iinbestigar kan nagtuturog na mga proyecto sa infrastractura kan gobierno sagcod na nagpatanid na sasangatan nin caso kriminal an mga responsableng opisyal.

Sinda dating juez na ngonian PABA Marvel Clavecilla  asin Commissioner Manuelito Luna kan PACC nag-atubang sa press conference sa paagi kan Kapihan sa  Metro Naga Chamber of Commerce and Industry (MNCCI) nganing saindang ipaliwanag sa media an mga ginigibong aksyon sa campaña laban sa kurapsyon sa gobierno asin arabalang proyecto na an apektado iyo an publiko.

 Nagpoon sinda sa pag-monitor kan proyecto digdi sa Camarines Sur asin isusunod an Catanduanes alagad saro sa naging mainit na tema iyo an duwang taon nang abalang pagtapos kan P1.2 bilyones na tolong mga edficio kan Bicol Medical Center (BMC) na enot nang pig-inaguraran an walong escalon na edificio alagad mayo man nin mga medical equipment.

Pigbuyagyag ni Usec Clavecilla na duwang taon nang dai nagiging operational an bagong mga edficio asin magiging white elephant an pigsasabing world class na edificio kan BMC kun padagos na mayong mga medical equipment asin problema sa contruksyon kan edificio mala ngani nagsasayumang mag-isyu nin occupancy permit an Bureau of Fire Protect sa Ciudad nin Naga matapos madiscobre an mga pagbalga sa Fire Code na estrictong iimplementar kan ahencia.

Si Dr. Maria Maria Estrella Litam, jefe kan hospital nagsabi na igwa na sindang pighaman na opsyon sa edificio nganing ma-ocupar alagad an desinyo kan bagong edificio base sa plano kan nagtalikod na administrasyon.

Sinabi pa na saro sa pigbiklad ni dating BMC Medical Chief Dr. Efren Nerva iyo an plano kan Cancer Center Bldg. na yaon na an Cancer Equipment na nagcacantidad nin P200 milyones alagad mayong cuarto na radiation proof.

Nagtalaan an BMC nin inagurasyon kan 5th Story Bldg. kan Cancer Center kan nakaaging Hulyo 1, 2018 alagad inuktaba huli ta binabaha an groudfloor kan edificio.

Sinabi man ni Tommy Lee, Executive Officer kan PABA na sa ginibo nindang inspeksyon harayoon an distancia kan Emergency Room pasiring sa Operating Room na kaipuhan magsakat sa paagi nin 337 hagyanan.

Afuera pa kaini si Emergency Room na dapat yaon sa groundfloor binugtak sa ika-tolong escalon, saro ini sa dahilan na an BFP sa Ciudad nin Naga nagsasayumang mag-isyu nin occupancy permit.

Bako sana sa problema sa edificio nagkakaigwa pa nin mga kumplikto an hospital administration asin an mga doctor sagcod na nagrerebelde, sabi pa ni Clavecilla.

Natuyawan pa na envez na magkua nin consultant na civil engineer alagad an pigkua sanitary engineer.

Pigpaliwanag pa kan PACC na sinda ‘’motu proprio’’ pueding magsangat nin caso laban sa mga kuraptong opisyal kan gobierno na saindang sakop an mga presidential appointees sa Sanga kan Ejecutivo asin arin man  na ahencia de gobierno na nag-oocupar kan posisyon na Assistant Regional Director o may klasificado bilang salary grade 26.

Pigbuyagyag pa kan PABA asin PACC na sinda an naging responsable nganing basbasan an Calabanga Ice Plant asin Cold Story project asin pigtatawan na nin prioridad na mapadali na maging operational an P50 milyones na Calabanga Fish Port Terminal.

An  sinambit na darakulang proyecto narealisar kan Congresswoman pa si Bise Presidente Leni Robredo kan tercer distrito kan Camarines Sur alagad an ibang opisyales de barangay asin kan LGU Calabanga na nagsayuma pang magpasambit kan saindang pangaran nagsabi sa media na dai lamang pinapaisi an opisina kan VP kan gigibohon na actividad bilang pagrespeto sa nagdara kan proyecto.

Sinabi pa na kun naabala an opersyon kan Calabanga Ice Plant asin Cold Storage saindang binabasol si Alcalde Ed Severo huli ta habong recibihon an sinambit na proyecto labi nang duwang taon an nakaagi sa dahilan sa politica.

Presente sa sinambit na press conference an iba pang opisyales kan PABA, PACC asin opisyales kan MNCCI sa pamamayo kan saindang Presidente na si Ferdinand  Sia, Jose Perez asin iba pang pag-iriba.                                                                                                                                                      (DPAureus)        





 

Share on Facebook
Share on Twitter
Please reload