Pag-okag sa mga jefe de pulicia, ipaaram sa alcalde

Duwa sagcod sa tolong taon an fullfledged na jefe de pulicia antes idakit sa ibang destino alagad kun mapapaamay na ibalyong Municipal Police Station kaipuhan ipaaraman sa alcalde nin banwaan kan provincial director. Ini an piglinaw ni Regional Director Josephmar Gil kan National Police Commission (Napolcom) sa Bikol sa atubangan kan mga na-enot na reclamo kan ibang mga jefe ejecutivo lokal na basang hinahali an saindang jefe de pulicia na mayong ginibong cortecia sa pamayo kan LGU. Alagad sa mga designadong OIC asin acting chief of police ano man na oras pueding ibalyong destino kan provincial director. Sinabi kan Napolcom an sarong opisyal kan PNP nadedestino sa Municipal Police Station nagdefende sa saindang ranggo asin kun nadestino sa sarong dakulang municipalidad asin dai bagay sa saindang ranggo kaipuhan ribayan nin mas nakakalangkaw na opisyal. Saiyang pig-ehemplo digdi sa Camarines Sur an mga municipalidad kan Libmanan, Pili, asin Ciudad nin Iriga an dapat magpugol kan MPS kaipuhan may ranggong police superintendent. Nagkapera pang mga MPS sa Camarines Sur maging sa iba pang provincia kan Kabikolan, mga OICs an nagtutukaw na chief of police huli ta kulang an mga calificadong opisyal. An Ciudad nin Naga na sarong District Office o Naga City Police Office (NCPO), kaipuhan digdi may ranggong Police Senior Superintendent arog kan presenteng nakatukaw na City Director Jonathan Panganiban. Sinabi pa mantang an NCPO dai sakop kan PNP Provincial Office kan Camarines Sur an pagribay nin City Director dai na naagi sa Napolcom Bikol envez sa Camp Crame.