Bagong votantes, manga transferee nangengenotan sa nagpapalista sa Comelec

August 9, 2018

 

 

Nangengenotan an bagohan na votantes asin nagbalyong estaran hali sa ibang mga ciudad asin municipalidad an nagpapalista sa opisina kan Commission on Election sa Ciudad nin Naga sa nagpapadagos na continuing registration na nagsikad kan Hulyo 2 hasta Septiembre 29, 2018.

Igwa nang kagabsan na 1,254 na bagohan na votantes mayoria digdi si nag-eedad na nin 18 años mantang si nagbalyong estaran hali sa ibang mga ciudad asin municipalidad igwa nang kagabsan na 1,025.

Si Election Officer Atty. Maico Julia Jr. nagsabi na base  sa listahan kan saindang Voter’s Registration Monthly Monitoring Output poon kan Hulyo 2 hasta Hulyo 31, 2018 igwa nang total na 3,005 an saindang naproceso asin inaabot nin 70 hasta 100 an nagpapalista sa saindang opisina aroaldaw kaayon na digdi si mga ginibong satellite registration sa mga barangay kan ciudad asin sa escuelahan.

Sa lado kan mga reactivations, correction of entries asin change of name/correction of entries igwa  nang kagabsan na 726.

Sinabi pa kan Comelec Naga halangkaw an numero kan mga nagpapalista hali sa ibang mga ciudad asin municipalidad mientras na dai kabali si mga transferee kan huring continuing registration na ginibo kan Noviembre 2017.

Nagkapera sa mga dahilan kun halangkaw si numero kan mga transferee hali sa ibang mga ciudad asin municipalidad si mga nag-eestaran sa mga subdivision kan ciudad alagad dai pa rehistrado bilang votante, senior citizens pinagmarhay na digdi na magpalista huli ta igwang mga biyaya hali sa City Hall, mga negociante asin matrabajo digdi na saro sa rekisitos rehistradong votantes digdi.

An mga aplikante hinahagad kan saindang validong IDs nganing maproceso an saindang papeles bilang bagong votantes asin mga transferee.

Kan nakaaging Barangay asin Sangguniang Kabataan elections kan Mayo 2018 an ciudad igwang total na 96,281 asin piglalaoman madugang ini nin labi sa otso (8) mil na votantes, sabi pa ni Julia.           (dpa)



 

Share on Facebook
Share on Twitter
Please reload