CAMPAÑA VS SMOKE BELCHERS: Nakakalusot sa LTO, dakop kan ENRO

August 9, 2018

 

Kun nakakalusot sa acreditadong pribadong Emission Testing Center kan Land Transportation Office (LTO) an mga smoke belchers o nagbubugang maitumon na aso an tambutso nin mga vehiculo alagad dai sinda nakakalusot sa City Environment and Natural Resources Office  (ENRO) kan Ciudad nin Naga.

Si Engr. Alexander Caning, jefe kan ENRO office kan City Hall nagpahayag sa Bicol Mail sa ginibong operasyon kan saindang Anti-Smoke Beching Unit (ASBU) kan Hulyo 31 asin Agosto 1 sa national road kan Concepcion Pequeña asin sa Plaza Rizal sundo sa Emall sa kalabaan kan Peñafrancia Avenue sa total na 79 pigparang pampasajerong jeepnep 35 digdi an bagsak sa emission test asin 44 an pasado asin anas sinda naka-renewed na kan car registration sa LTO.

Igwa sindang sadiring gamit na ekipahes na inaapod na ‘‘opacimeter machine’’ sa saindang operasyon sa anti-smoke belching asin digdi nagkakadarakop si mga nagsisinutil sa ordinansa numerado 99-084 kan lokal na gobierno asin pag-implementar kan Acta Republica 8749 o mas midmid sa apod na Clean Air Act.

Pig-iimponer ninda an multa nin cantidad P1,000 si enot na mga nadakop,si duwang veces nang nagbalga cantidad P2,000 asin sa natolohan nang nagbalga nagmumulta nin P3,000.

Si Jayson Vargas, pamayo kan grupo kan ASBU nagpatanid pa na liwat sindang maluwas sa mga tinampo sa centro kan ciudad kabali na sa Maharlika Highway nganing ipadagos an estrictong implementasyon kan ley.

Sinabi ni Engr. Caning an saindang operasyon ginigibo nganing mabawasan an air pollution sa ciudad dara kan mga nagbugugang maitom na aso kan mga vehiculo.

An ASBU kan ciudad, deputized kan Land Transportation Office sa ginigibo nindang emission tests sa mga vehiculo gamit an opacimeter machines para sa crudo asin gasolinang makina.

Katuwang ninda sa campaña contra sa smoke belcher iyo an Naga City Police Office asin LTO.

Magigirumdoman an lokal na gobierno kan Ciudad nin Naga tinawan comendasyon kan Department of Environment and Natural Resources (DENR) kan nakaaging taon huli kan estrictong implementasyon kan saindang ordinansa laban sa smoke belchers.                                                                            ( DPAureus)           







 

Share on Facebook
Share on Twitter
Please reload