KB piglansar na sa Bikol

August 9, 2018

 

Piglansar na an Kusog Bikolandia (KB) sa paagi kan ‘‘1st Bicol all media convergence’’ na ginibo kan Sabado, Agosto 4 sa Casablanca Convention Center sa Ciudad nin Legaspi na pinangenotan ni Abogado Jorge Sarmiento bilang presidente kan Executive Board.

Inaatendiran nin maabot sa 400 na miembros kan media hali sa anom na provincia kan Bikol asin iba pang mga bisita.

Sinabi ni Sarmiento an KB sarong regional political party kan mga Bikolanos hali sa mga provincia kan Camarines Norte, Camarines Sur, Albay, Catanduanes, Sorsogon asin Masbate, alagad bako sindang parte kan party-list system.

Dakulang bagay an pagkakamukna kan KB nganing magkaigwa digdi nin sadiring political identity asin ideolohiya para sa pag-asenso kan Bikol. Ini kabaeng man kan Pundok Kauswagan o Partido Panaghiusa sa Cebu, an Partido Magdalo sa Cavite asin an Hugpong Pagbabago sa Davao.

Pigparehistro na sa Commission on Election kan Hulyo 16, 2018 na naghahalat nalang kan pag-aprobar mantang saindang pig-aandaman an pagparticipar sa midterm elections sa Mayo 13, 2019. Namukna ini kan Hulyo 5, 2018 sa ginibong special assembly kan Hulyo 5, 2018 sa Ciudad nin Pasay.

An saindang slogan iyo an Bikolanong Burunyog, Rehiyong Makusog!  para sa Development, Empowerment, Leadership, Unity, Nationalism asin Autonomy kan satong rehiyon.

Sa ginibong opem forum dai pa piglinaw ni Sarmiento an saindang tindog sa isyu kun mapabor sa pigtutulod na federalismo ni President Rodrigo Duterte.

Sinabi pa bilang regional political party puedeng magbugtak sinda nin mga candidato lokal asin puedeng magsaro sa iba pang partido political. Papahiwason an saindang organisasyon sa mga provincial asin municipal level sagcod sa iba pang mga sektor.

An Executive Board pinamamayohan ni Noel Del Luna bilang Chairman, an saindang Presidente si Abogado Jorge Sarmiento, Executive Vice President Abogado Roberto Rafael Lucila, Secretary General Carmelo Redencion De Leoz, Treasurer Flocerfida Azotea, Executive Director & VP-Albay Steve Resari, Vice President for Camarines Sur Abogado Felix Brazil Jr., Vice President for Sorsogon/Masbate Juan Escandor Jr., Vice President for Camarines Norte Abogado Febes Rosales, Vice President for Catanduanes Abogado Fredeswindo Gianan, Vice President for Sectoral Affairs Jose Perez asin Governance Officer Marcelino Manuel.                                                                                       
                                 (dpa)





 

Share on Facebook
Share on Twitter
Please reload