Programa ni VP Robredo sa paraoma kasurog kan ten year agricultural roadmap

Sa paagi kan Angat Buhay Program ni Bise Presidente Leni G. Robredo, pinahiwas ini sa paglansar kan OMAsenso sa Kabuhayan na tinatawan prioridad digdi si mga pobreng yaon sa sektor agricultura nganing mapaangat an saindang kabuhayan.c An programa suportado ni Alcalde John Bongat kan Ciudad nin Naga, Metro Naga Chamber of Commerce and Industry, Department of Agriculture, Department of Trade and Industry asin kan Committee on Agriculture sa Sanggunian Panlungsod sa pamamayo ni Consejal Julian C. Lavadia Jr. asin saiyang pag-iriba sa SP. Si Lavadia, iyo an padreno sa paghaman kan ten year agricultural roadmap sa Ciudad nin Naga asin masumpay ini sa programa ni VP Robredo. An OMAsenso sa Kabuhayan, sarong anti poverty program na kadakli sa mga fuerang lugar sa paagi kan Angat Buhay Program na dating nagpoon sa 50 grupo nin paraoma alagad sa ngonian igwa nang 176, sabi kan Bise Presidente. An reclamo kan mga paraoma an saindang produkto binabaratong bakalon kan mga negociante sa mercado alagad sa konsepto kan OMAsendo sa Kabuhayan, hahanapan sinda nin mga darakulang restaurant o ano paman na establisimiento nganing iyo an babagsakan kan mga inaning produkto na babakalon sa tamang presyo na dapag magganansa an paraoma. Dai na madidificilan na maghanap nin parabakal an mga paraoma sa saindang gugulayon asin ano paman na klaseng produkto agricultural huli ta igwa na sindang susuplayan dai pa malulugi mantang babakalon sa tamang presyo. Siisay man na grupo nin paraoma puedeng maghagad nin detalye sa programa asin magbisita sa opisina ni Bise Presidente Robredo na makukua harani sa City Hall. Si Consejal Lavadia nakatalaan magpadreno nin ordinansa sa Sanggunian Panlungsod nganing magbugtak nin Bagsakan Center sa paagi kan private-public partnership sa Win-Win Corporation sa Diversion road harani sa establisimiento kan Puregold. An Bagsakan Center dakulang bagay sa mga paraoma kan ciudad mantang igwa na sindang permanteng lugar na darahan kan saindang mga produkto agricultural na dadayohon nin mga negociente asin paroquiano bako lang hali sa Naga envez maging sa pagtaraid na mga municipio kan ciudad. Sinabi kan consejal komo pamayo kan Comitiba sa Agricultura, saro sa saiyang objetibo iyo na mapauswag an buhay kan paraoma. Ini huli kan saiyang paniniwala na ‘‘An asenso kan agricultura, asenso kan paraoma. An asenso kan paraoma, asenso kan banwaan. An asenso kan banwaan, asenso kan kagabsan’’. Sinabi pa na kun magtatarabangan, nahihiling an magayon na futuro kan satong banwaan.. kan lambang saro sa satuya, lalong-lalo na an futuro kan mga kaakian. (dpa)