ECC marerealisar na sa Naga - Kgd. Del Rosario

August 16, 2018

 

 

 

Nakatalaan nang marealisar an pangiturogan kan lokal na gobierno kan Ciudad nin Naga na makisabayan na sa darakulang ciudad na magkaigwang modernong Emergency Command Center (ECC) na icoconstruhir sa Almeda Highway sa Barangay Concepcion Grande.

Si Consejal Joselito Del Rosario, pamayo kan Committee on Peace and Order kan Sanggunian Panlungsod padreno kan inaprobaran na ordinansa kan 2016 sa pagpatindog digdi  kan  Command Center  na  pigtagamahan na nin P10 milyones na fondo kan 2017.

Sa dai mahahaloy matalaan na kan ground breaking ceremony nganing ponan na an implementasyon kan estractura sa laog kan tolong hektaryang lote kan ciudad na digdi man ipapatindog an mga edificio kan duwang escalon asin walong classroom na City College of Naga, Evacuation Center, City Health  Office 2, Convention Center, Physical Therapy and Rehabilitation Center asin Life Counseling Center.

Ogma an consejal na marerealisar man giraray an saiyang kamawotan na madagos an pagkaigwa na digdi kan ECC matapos maaprobaran an ordinansa kan 2016 mantang kaya na kan City Hall an pagtagama nin dakulang fondo arog kan mga darakulang ciudad sa Cebu, Makati, Davao asin iba pang bilyonaryong ciudades.

Kinakaipuhan an suporta sa mga responders siring kan Bureau of Fire Protection, Naga City Police Office, City Disaster Risk Reduction and Management Office asin Public Safety Office huli ta sinda an naka-front line asin kaipuhan ninda an mas modernong facilidad, sabi pa ni Del Rosario.

Responsabilidad kan ECC, siya an masararo kan gabos na aspeto kan tolong ‘’C’’ na compuesto kan Command, Control and Cordination, ini mas mahalaga mantang nakakaiba digdi si inter agency cooperation sa gabos na ahenciang kabarali tanganing marikas an aksyon asin responde sa ano man na panga-ngaipo.

Ibubugtak digdi an CCTV, pagpahiwas sa pag-kontak sa mga barangay asin iba pang force multiplier.

Pig-osipon pa kan consejal an saiyang pangeturogan na maging ‘’safe and sound’’ an gabos na Nagueño maging si mga bisita o naglalaog sa Naga hali sa pagtaraid na banwaan asin ciudad maging sa iba pang lugar.

Si Del Rosario antes napiling miembro kan SP, dating jefe kan PSO na naheling niya an padagos na pag-asenso kan ciudad mantang an ambisyon kaidto ni dipuntong Alcalde Jesse M. Robrdo na magkaigwang marikas na serbisyo asin onorableng serbisyo sa mga namamanuan kan ciudad na sagcod sa ngonian pinapadagos kan liderato ni Alcalde John Bongat.                                                                              
                          (dpa)


 

Share on Facebook
Share on Twitter
Please reload