SP amay na nagpatanid contra sa Evenchance

August 16, 2018

 

Dai pa nasikad an operasyon kan Small Town Lottery (STL) sa Ciudad nin Naga, alagad amay pinatanidan an Evenchance and Gaming Corporation Inc. kan Sanggunian Panlungsod na puedeng bawion an resolution of no objection kun masinutil sa mga term and conditions.

Sinabi ni Consejal Julian Lavadia Jr. na dapat estrictong magsunod an Evenchance and Gaming Corporation Inc. sa mga kondisyones nganing dai sinda magbasol na bawion an sinambit na resolucion.

An Evenchance iyo an may  franquicia hali sa PCSO nganing magbugtak digdi  nin STL Station alagad dapat saindang sunodon an mga minasunod;  an saindang mga correador o kolektor  dapat naka-uniporme asin may ID, dai magpataya sa menor de edad, sa luwas kan saindang sakop na STL Station, asin iba pang mga kondisyones na yaon sa laog kan term and conditions, sabi pa kan consejal.

An consejal na iyo an nagtulod sa sesyon regular kan  Sanggunian Panlungsod kan Martes, Agosto 14 na magpasar sinda  nin resolution of no objection sa STL nganing tugotan kan saindang operasyon sa laog kan ciudad.

Sa resulta kan vorotohan pito an nagpabor na kinababalihan ninda, Consejales Lavadia, Nene De Asis, Mila Raquid-Arroyo, Ray-Ann Cydric Rentoy, Joselito Del Rosario, sinda ex-officio member Antonio Beltran kan Liga ng mga Barangay asin  Kayle   Tripulca   kan SK Federation.  An nagcontra sinda Salvador Del Castillo asin Vidal Castillo mantang an nagwati si Greg Abonal.

Si Bise Alcalde Nelson Legacion, presiding officer kan SP nagsabi na mapirma siya sa resolucion alagad ipapaluwas niya an an saiyang panindugan na nagcocontra sa resolucion sa operasyon kan STL.

Nagkaigwa nang operasyon an Evenchance sa ibang provincia,  alagad sinabi kan bise alcalde na saiyang pigcucuestion an pagbugtak digdi kan STL huli ta dakul pang mga kahapotan arog kan isyu na igwa pa nganing kahirasan na dapat ibayad sa PCSO na nagcacantidad nin P156 milyones, mga pagbalga sa mga term and conditions asin iba pang isyu legal na mayong malinaw na kasimbagan asin arog man kaini an punto ni Consejal Del Castillo kun dai siya nagvoto pabor sa resolucion.

Kun completo an mga documento asin nasimbagan an ibang isyu legal mapabor ako sa resolucion, sabi pa ni Del Castillo.

Sinabi man ninda Consejal Joselito Del Rosario asin Consejal Lavadia na praktikal an saindang pagpabor sa STL huli ta dakul na mga tios na familia o pasyente sa mga hospital asin igwa pa nganing may cancer natatabangan kan PCSO.

Maging an City Hall nagrerecomendar nin mga pasyente sa PCSO na kinakaipuhan matabangan huli ta nagtitios na familia.

Antes na-aprobaran an resolucion nagpaliwanag sa SP si PCSO Provincial Manager Jobet Ramos kan legalidad kan Evenchance maging an operator kaini.








 

Share on Facebook
Share on Twitter
Please reload