SA CASURECO II: Nagdesignar na nin OIC, Lalas habong maghali

Binawi na kan National Electrification Administration (NEA) an nombramiento ni Engr. Nelson Lalas bilang Project Supervisor/Acting General Manager kan Camarines Sur II Electric Cooperative (Casureco II) poon Agosto 15, 2018 na tolos man nagdesignar nin Officer-In-Charge an junta directiva mientras na dai pa nakakapili nin permanenteng general manager. Alagad naggibo man nin salongat na desisyon an junta directiva na hinahagad sa NEA palawigon pa sa puesto si Lalas. Tolos nagdalagan sa Manila an PS/AGM bitbit an resolucion nganing pa-aprobaran ki NEA Administrator Edgardo Masongsong na dai pa siya halion digdi asin pinaondrahan hasta sana sa Septiembre 7, 2018. An resolucion kan junta gustong palawigon sa puesto si Lalas sagcod na dai pa natatapos an paghobo kan mga electrical post na apektado kan road widening project kan Department of Public Works and Highways. Si Corporate Planning Manager Emerlita Candia iyo an tinukahan kan junta directiva bilang Officer-In-Charge na kaipuhan man giraray an kumpirmasyon kan NEA. Siya dati nang pigdedesignar ni Lalas na OIC kun na-viaje pasiring sa Manila. Si Naga North District Director Jun Cornelio nagsabi na an nombramiento kan matukaw na OIC kan cooperativa maagi man giraray sa NEA nganing iyo an mag-aprobar. Sa Sanggunian Panlungsod kan Ciudad nin Naga, sinabi ni Consejal Joselito Del Rosario na saindang pigcocontra an kahagadan kan junta na dai na muna halion si Lalas mantang nagkaigwa nganing controvercia apesar tapos na si sarong taong na peryodo sa pagdakit kan mga poste nagpopoon pa sana sa Calabanga asin Bombon, Camarines Sur. Maging si dating Juez asin Presidential Adviser for Bicol Affairs Marvel Clavecilla nagsabi na saiyang uulangon an pagpalawig sa puesto sa PS/AGM asin dapat iimplementar na an kasugoan kan NEA na sagcod na sana sa Agosto 15 alagad pig-extendir hasta sa Septiembre 7. Si Administrator Masongsong iyo an nagpadara kan memorandum sa junta directiva na pinamamamayohan ni Board President John Paul Sta Ana petsado Agosto 1, 2018 na magdesignar na nin OIC asin dapat isumiter tolos sa saiyang opisina antes kan Agosto 15. Kaayon sa dahilan kan NEA na maninigo nang bawion an nombramiento ni Lalas huli ta saro ini sa kahurotan kan junta directiva sa paagi nin resolucion numerado 2018-017 sa rason na loss of trust and confidence asin bako na sindang ailing cooperative. Afuera pa kaini, pigdangog man an resolucion kan LGU Calabanga, Camarines Sur na bako man ailing cooperative an Casureco II asin dapat nang pabalikon na si Lalas sa NEA. An pinakahuring basehan na nag-angat an categorization kan cooperativa mala ngani pigdeclara na kan NEA bilang ‘’AAA’’. (dpa)