Areglo sa politica ginaba

August 23, 2018

 

Dai matapsok sa politica an sakuyang esposa kun mayong kasundoan asin areglo sinda ni Alcalde Madel Alfelor kan Ciudad nin Iriga na liwat ining ma-re-election sa maabot na midterm election nurong taon envez kan pagcandidatong congresswoman.

Ini an pigbuyagyag sa miembros kan media ni Congresista Salvio Fortuno kan Rinconada district sa isyu ni Alfelor contra sa saiya na igwa sindang kasundoan na pakatapos kan termino niya sa congreso sa 2019 an jefe ejecutivo na an maribay komo candidatong congresswoman sa pirilian sa Mayo 2019.

Sinabi kan paluwason nang congresista kan Rinconada area na nagkaigwa sindang areglo ni Alcalde Alfelor para sa 2019 election na mapadagos giraray sa pagdalagan komo alcalde kan saindang ciudad alagad igwang nagtintar sa alcalde nganing magbalyong kudal asin magdeclara na macandidatong congresswoman sa saindang distrito.

An candidatong tatambodan ninda Fortuno asin Gobernador Migz Villafuerte bilang congresista sa ika-limang distrito iyo si Mrs. Jocelyn Fortuno, esposa kan congresista na iyo an saindang kasundoan  asin ni Congresista LRay Villafuerte komo saindang lider sa partido digdi sa Camarines Sur.

Alagad sinabi pa kan lehislador na mayong problema kun nagbalyo nang kudal an alcalde mantang completo pa an saindang mga alcalde asin mga lider sagcod sa mga barangay kan Rinconada district.  
    
MRS. FORTUNO PIG-INDORSO    
NI ALCALDE ALFELOR BILANG
CANDIDATONG CONGRESSWOMAN        

Pigbuyagyag pa ni Fortuno sa miembros kan media sa ginibong press conference kan Sabado, Agosto 18 na pig-indorso sa atubangan kan publiko ni Alcalde Alfelor kan nakaaging Abril 2018 an saiyang esposa na si Jo Fortuno na iyo an saindang susuportaran bilang candidatong congresswoman kan Rinconda district sa maabot na midterm election sa Mayo 2019.

Alagad nabigla sinda kan magbirik nin tambod an alcalde envez nagkumfirmar kan saiyang pagdalagan komo congresswoman.

Suportado nin evidencia an mga pahayag kan congresista kan Rinconada district sa paagi kan saiyang pinaheling na video na pig-iindorso kan jefe ejecutivo an saiyang esposa na bilog an saiyang suporta sa maabot na pirilian lokal.      

Nagtutubod pa an congresista na dai  makaka-apektar sa candidatura  kan saiyang esposa an pagbalyo ni Alfelor sa campo ni Congresista Rolando Andaya Jr. na macandidatong gobernador laban ki Gobernador Migz Villafuerte.   

Prueba kaini, kan pirilian lokal kan Mayo 2010 dai ninda kaalyado an mga Alfelor alagad ginana ninda ni Gobernador Migz an resulta kan eleksyon.

Tinuyaw man ni Congresista LRay Villafuerte kan segundo distrito kan Camarines Sur an pagbalyong kudal ni Alfelor apesar kan saiyang pigpangakong leyaltad sa mga Villafuerte asin ki Fortuno asin sinabihan na ‘’mayo ining palabra de honor.’’  

NAGSUMPA NA
SA PDP-LABAN

 Sinabi pa na andam na sinda sa laban sa eleksyon asin maging representante kan saindang distrito an saiyang esposa mala ngani nagsumpa na sa PDP-Laban, partido kan administrasyon asin alyansa kan Hukpong Pagbabago ni Alcalde Sarah Duterte kan Ciudad nin Davao asin iyo naman an partido political ni Presidente Rodrigo Duterte.

Si Mrs. Fortuno, veteranong educador, eskolar asin nagpugol nin halangkaw na posisyon sa Departamento de Edukasyon antes nagtiro sa serbisyo.



NAKASAKDO BILYONES PESO
NA MGA PROYECTO SA INFRA                 

Bako lang milyon-milyon envez bilyones peso an na-iimplementar na mga proyecto sa infrastractura kan representante kan Rinconada district kan Camarines Sur para sa taon 2017 asin 2018 alagad madudugangan pa ini sa masunod na budget nurong taon.

Pinabulosan nin mga proyecto an mga banwaan kan Balatan, Buhi, Baao, Bula, Bato Nabua asin Ciudad nin Iriga mala ngani nagpapadagos pa an contruksyon kan bypass road sa banwaan nin Nabua na nagcacantidad nin P84-M asin igwa pang dugang na P50-M para sa sunod na taon 2019 nganing matapos an dakulang proyecto, sabi ni Fortuno.

Dai na masaro-saro an halabang listahan kan mga proyecto na kinababalihan nin mga patinampo, multi-purpose bldg., public school bldg., flood control project, farm to market road, revetment, drainage systems, patubig asin scholarship sa mga jovenes  asin dakul pang iba asin mga programa nganing matabangan an residentes kan barangay na sakop kan ika-limang congressional district kan Camarines Sur.

Labi sa dos bilyones peso an kagabsan na saiyang na nasakdo (2017-2018) nganing iwarak sa  anom na mga municipalidad asin sarong ciudad kan Rinconada area, alagad dai pa kaayon digdi si enot asin ika-duwa niyang termino sa Camara-Baja.

Mientras tanto, si Mrs. Fortuno na nagtatabang sa mga programa kan saiyang esposo nagpahayag na saiyang ipapadagos an magagayon na mga proyecto kan paluwason na congresista an mga proyecto asin programa na nagustohan kan mga taga Rinconada.                                         





 

Share on Facebook
Share on Twitter
Please reload