De Asis macandidatong alcalde sa 2019 election

August 23, 2018

 

Duwang bulan antes pagplantiar nin certifico de candidatura para sa midterm election, si topnotcher Councilor Cecilia ‘’Nene’’ De Asis nagkumfirmar kan saiyang ambisyon na magdalagan komo candidatong alcalde sa lindong kan Team Naga (TN) alagad masunod siya sa selection process na dati nang ginigibo kan panahon ni dipuntong Alcalde asin DILG Secretary Jesse M. Robredo.

Si De Asis nagpahayag na nagpaaram na siya ki Bise Presidente Leni Robredo asin Alcalde John Bongat kasunod kan mga pag-indorso sa saiya kan nagkaperang sektor na panahon na ining maglangkaw nin puesto sa ciudad envez kan enot na planong macandidato sana sa cargong bise alcalde.

An ambisyon kan consejal pinahayag sa atubangan ni VP Robredo na presente an miembros kan Sanggunian Panlungsod sa ginibong tiripon ninda sa residencia kan bise presidente kan nakaaging Agosto 16, 2018.

Dai man nagcontra an bise presidente alagad an patanid dapat magsunod sa selection process na naagi sa manlaen-laen na sektores asin resulta kan survey.

Pinasa na kan bise presidente ki Alcalde Bongat komo pamayo kan TN na ponan na an proceso mantang enot nang nag-anunciar na madalagan sa cargong alcalde iyo si Bise Alcalde Nelson Legacion.

An bise alcalde nagsayuma magpaluwas kan saiyang reaksyon sa biglaan na desisyon kan consejal na maging karibal sa selection process envez sinabi kaini na candidato man siya sa nagdadangadang na pirilian lokal sa Mayo 2018.

Dinagdag pa ni De Asis siring kan mga nakaaging dalagan sa politica sa ciudad sa panahon ni Robredo asin sa presenting liderato ni Bongat na nagrerespeto kun ano an resulta sa selection process iyo man an saiyang susunodon.

Pigbuyagyag pa kaini, na igwa nang seguradong mga incumbent na miembros kan Sanggunian Panlungsod an nagseguro na maiba sa saiya kun iyo an susuportaran kan TN alagad dai na muna pigngaranan.

Sa ngonian an mga re-electionista kinababalihan ninda Consejales Esteban Greg Abonal, Sonny Ranola, Elmer Baldemoro, Mila Raquid-Arroyo, Julian Lavadia Jr. Joselito Del Rosario, Vidal Castillo asin Salvaldor De Castillo mantang si Consejal Ray-Ann Cydrick Rentoy ultimo  nang termino asin nag-aambisyon na magcandidatong bise alcalde.

 

Share on Facebook
Share on Twitter
Please reload