CD Panganiban kan NCPO pigribayan OIC

August 30, 2018

 

Igwa  nang bagong OIC City Director an Naga City Police Office (NCPO) matapos kan ginibong simpleng turn-over  of command kan Martes, Agosto 28 hali ki City Director Sr. Supt. Jonathan Panganiban asin pigribayan na siya ni Sr. Supt. Felix Servita na matukaw komo Officer-In-Charge (OIC).

An OIC CD dating Provincial Director kan PNP Provincial Office sa Catanduanes asin dati naman siyang nadestino sa PPO  Camarines Sur maging sa iba pang mga provincia mantang si Panganiban pigdestino na sa Camp Semion Ola kan Bikol PNP sa Ciudad nin Legaspi.

Sa pag-atubang sa miembros kan media kan OIC CD, saiyang sinabi na si dating mga campaña kan PNP sa paz y orden asin paglaban sa ilegal na droga iyo an saiyang prioridad mantang digdi nakatutok an saindang higher command.

Nagrarani na an dakulang actividad sa Festividad ni Ina sa masunod na bulan nin Septiembre asin ini an saro sa saiyang trabajo nganing maseguro an paz y orden.  Aram niya an kapiestahan ni Ina pigdadayohan nin labi sa on milyon na lokal asin dayuhan na bisita asin devotos hali sa manlaen-laen na ciudades asin provincia maging hali pa sa ibang nasyon.

Nagcortesiya na siya kasoodmang hapon ki Alcalde John Bongat na saro sa pig-orolayan an mga ginigibong pag-andam kan City Hall asin NCPO iyo an maabot na Peñafrancia fiesta.

Napag-araman saro sa mga isyu kan Bikol PNP sa biglaan na pag-relieved ninda ki Panganiban kasunod kan pagbuyagyag ni Presidente Rodrigo Duterte na an Ciudad nin Naga sarong hotbed sa ilegal na droga asin dai palang nahahaloy an NCPO nasa top 5 sa mga ciudades na may halangkaw na crime volume, base sa pinaluwas na datus kan Directorate for Investigation and Detective Management Crime Research and Analysis Center kan Camp Crame, Ciudad nin Naga.

Alagad an mga alegasyon na an Naga sarong hotbed sa droga asin top 5 sa crime volume kinondenar kan City Hall huli sa kawaran nin basehan asin pigtutubodan na pamomolitica sana mantang si Bise Presidente Leni Robredo sarong Nagueño.

Sa paagi nin resolucion kan Sanggunian Panlungsod, hinahagad ki P/Director General Oscar Albayalde kan PNP na sugoon an PNP-DIDM na ipatama an saindang pinaluwas na datus huli ta mayong basehan asin mayong katutoanan na an Ciudad nin Naga igwang nang average na monthly crime rate na 273.8 poon kan Enero hasta Abril, ngonian na taon.

Si Consejal Joselito Del Rosario, pamayo kan Committee on Public Safety kan SP iyo an nagtulod kan sinambit na resulocion asin kabali sa hinahagad dapat magpaluwas nin public apology an Camp Crame.






 

Share on Facebook
Share on Twitter
Please reload