Legacion preparado sa laban sa cargong alcalde

August 30, 2018

 

Matapos kan consultasyon sa mga lideres kan Team Naga, si Bise Alcalde Nelson Legacion nagdeclara na kan saiyang kaandaman sa pagdalagan bilang candidatong alcalde kan Ciudad nin Naga sa maabot na midterm election nurong taon.

Kan nakaaging sarong semana an bise alcalde iginilid muna an pagtao nin mga reaksyon sa nagkaperang controvercia na mga isyu sa Ciudad nin Naga maging sa biglaan na pagpahayag  nin intensyon ni Consejal Cecilia De Asis na interesadong mag-ayon sa listahan kan macandidatong alcalde sa paagi kan pinapasunod na selection process kan Team Naga.

Naging silencio sa pagsimbag sa politica kan nakaaging semana an bise alcalde alagad saiyang sinabi ‘’sa heling ko napapanahon na para magtaram sa paagi kan pag-atubang sa press conference, ipinahayag ko an sakuyang kaandaman na pangenotan an Team Naga bilang alcalde para sa midterm election’’.

An pigpipilian na maging ka-tandem bilang candidatong bise alcalde iyo si Consejal Ray-An Rentoy na ultimo nang termino asin si Consejal De Asis alagad magdedefende kun siisay sa duwa an magluwas matapos an consultasyon base sa proceso kan TN.

Kan nakaaging semana si De Asis nagsabi na preparado siya na magcandidatong alcalde asin andam na magsunad sa selection process sa paagi nin mga consultasyon asin survey kan TN, kun ano man an resulta nag-asegurar ini na masunod sa proceso.

Nanindugan an bise alcalde kan saiyang ambisyon na dagos an laban mantang dakul nang grupo an nagpapahayag nin bilog na suporta kan saiyang candidatura.   

Pigbuyagyag pa na maging an ibang sektor asin comunidad sa Naga kun may ginigibo sindang consultasyon, ‘’an kurahaw dapat magpadagos ako kan candidatura komo alcalde sa maabot na midterm election’’.

Afuera pa kaini, sa survey siya man giraray an nangengenotan asin harayo na an nag-iikaduwa.

Sa kahapotan kun si De Asis magdagos magcandidatong alcalde, sinabi kan bise alcalde na ‘’ako po kaya very optimistic na ako an magiging standard bearer kan TN bilang candidatong alcalde’’ Tiwala siya na masunod an consejal sa resulta kan selection process kaya ngani saiyang pigpipilian na maging candidatong bise alcalde sinda De Asis asin Rentoy.

Mantang nagrarani na an pagplantiar nin certifico de candudatura sa Commission on Election sa Oktubre 2018 mayo pang nagluluwas na ibang pangaran na posibleng tambodan kan kampo ni dating Congresista Luis Villafuerte komo candidatong alcalde sa pirilian lokal sa Mayo 2019.
 



 

Share on Facebook
Share on Twitter
Please reload