OPAB NAGHANAP SOLUSYON SA TUBIG BAHA: P15M pigtagama kan NIA sa modernong flood gate

August 30, 2018

 

An National Irrigation Administration (NIA) nagcierto sa Office of Presidential Assistant for Bicol Affairs (OPAB) nin P15 milyones na fondo  sa 2019 budget para sa rehabilitasyon kan irrigation control structure  sa Brgy. San Agustin, Canaman, Camarines Sur nganing  bagohon an desinyo sagcod na lalakbangan asin gigibohon nang modernong flood gate structure.

Si dating Juez asin Presidential Assistant for Bicol Affairs Marvel Clavecilla nagkumfirmar sa pinaapod niyang orolay ninda Consejal Vidal Castillo komo chairman kan Technical Working Group, Assistant District Engr. Richard Emmanuel Ragragio kan 2nd Engineering District kan DPWH sa Baras, Canaman, Camarines Sur, Punong Brgy. Josue Perez Sr. kan Brgy. Pacol, asin Acting Manager kan NIA Camarines Sur Engr. Nestor Cortez miembros kan TWG sa paghanap nin solusyon sa problema sa tubig baha sa magkataid na subdibisyon sa Barangay San Felipe asin Barangay Calauag.

An irrigation control structure sa San Agustin, Canaman, CSur iyo an luwasan kan tubig hali sa magkataid na barangay San Felipe-Brgy. Calauag asin kun marealisar an bagong desinyong mechanical gate dakulang bagay nganing resolberan na an problema sa tubig baha digdi, sabi ni Castillo.

Sa pinakahuring orolay ninda kan Agosto 2, 2018 an NIA Bikol nag-asegurar kan sinambit na cantidad nganing iyo an gamiton na fondo sa rehabilitasyon kan irrigation control structure kan ahencia na saro sa causa kan nangyaring paglantop nin tubig baha kan nakaaging Enero 12, 2018.

Si Consejal Castillo, pamayo kan Committee on Infrastructure sa Sanggunian Panlungsod kan Ciudad nin Naga saiya nang natukar sa paagi nin privilege speech sa consejo an nangyaring paglangkaw nin tubig baha kan Enero 12 sa duwang subdibisyon kan Brgy. San  Felipe asin Brgy. Calauag na saro sa causa iyo halangkaw na irrigation control structure kan NIA huli kan hayapit an luwasan nin tubig kaini.

Saiya pang sinabi na maninigo na an rehabilitasyon kan sinambit na irrigation canal sa Canaman na konektado sa waterway kan Barangay Calauag.

Saludo an consejal sa PABA sa paghanap nin solusyon na maresolberan an problema sa tubig baha nganing maibitaran an halangkaw na tubig baha sa duwang subdibisyon sa magkataid na barangay.

Komo PABA, mandato sa saiya kan Malacañan an pag-monitor kan kamugtakan kan rehiyon particularmente sa lado nin socio-economic development kan Kabikolan.                  (dpa)






 

Share on Facebook
Share on Twitter
Please reload