Lider estudiante diskuntento sa 90 dias na suspension vs school administrator

Nagkaigwa nin mga trauma si mga estudiantes bakong maninigo tawan sana siya nin noventa diyas na suspension envez tama asin samuyang pigsusuportaran an recomendasyon kan Department of Education (DepEd) sa Bikol na mag-indefinite leave of absence an administrador kan Bicol Central Academy (BCA) sa Libmanan, Camarines Sur. Kulang an noventa diyas alagad arog kaini an naging desisyon kan Board of Trustees kan escuelahan na madaling mamaniobra kan pigrereclamong si Administrador Alexander James Jaucian asin dapat irespeto an recomendasyon kan DepEd. Ini an reaksyon ni dating City Youth Councilor Al Florence Albo kan Ciudad nin Naga asin estudiante kan A.B. Political Science sa Ateneo de Naga University contra sa naginibong pagsurolo kan administrador sa mga gamit nin mga estudiante kan Senior High School kan BCA na kinababalihan nin laptop, cellular phone, cuarta, mga notebook, libro asin iba pang personal na kagamitan na yaon sa laog kan saindang pigsurolong mga backpacks. ‘’Pagkadismaya an salang gibo ni Jaucian asin elihido pang vocal na nagrerepresentar kan segundo distrito kan Camarines Sur, mayo siyang deretso na suroloon an mga gamit nin estudiantes asin insulto pa ini mantang bako man siya an nagfundar o naggastos envez an mga pobreng magurang kan estudiantes, kun gustong disiplinahon an mga menor de edad na estudiantes dapat si tamang castigo asin pinaapod si mga magurang.’’ Sa mga jovenes na parejo ko dapat irespeto ta an paratukdo asin maprotehiran man an satong deretso, sabi pa. ‘’As a youth leader we are disappointed sana nag-isip pa an school administrator asin dai nadara sa kaangotan niya sagcod na puede pa ngani siyang kasohan kriminal’’ Sa suhay man na reaksyon kan saro pang lider estudiante, sinabi ni Mar Ampongan kan Jovenes Anakbayan Camarines Sur na ‘’Tinututulan po naming ang ganitong aksyon ng DepEd. An pagbigay po ng indefinite leave of absence ki Jaucian ay isang porma ng impunity. Kailangang panagutin siya sa nagawa niyang violation sa student democratic rights ng BCA’’. Kan nakaaging semana an DepEd Bikol sa pamamayo ni Regional Director Gilbert Sadsad pinangenotan an sarong dialogue kan mga nagrereclamong magurang asin kan mismong school administrator Jaucian na nag-ako kan saiyang salang gibo sagcod na naghagad nin despensa. ‘’I’m very sorry, I’m very sorry, sabi ni Jaucian sa atubangan kan mga magurang asin nagpapangako na babayadan si mga pigsurolong kagamitan kan estudiantes. An ibang magurang tugot na sa areglo alagad si iba nagsabi na pacil an paghagad nin despensa an problema ninda na trauma an saindang menor de edad na estudiantes. Pig-osipon ni Jaucian an nangyari kan Agosto 17 na nagtao siyang instruksyon sa senior high school students na dai na magdara nin backpacks huli ta masulot sinda nin business attire sa aldaw na iyan para sa Tatsumake Day alagad kadakli sa mga estudiante dai pa preparado Ini si naging causa kan maanggot an opisyal kan escuelahan sagcod na pinatiripon si mga backpacks asin sinurolo. Nagrecomendar an DepEd Bikol enot dapat bayaran si mga sinurolong gamit, asin ika-duwa si Grade eleven dapat sinda gabos ipasa-irarum sa stress debriefing na makua sinda nin Guidance Councilor hali sa Camarines Sur nganing darahon sa BCA. Afuera pa kaini, mas magabat pang recomendasyon an ipapadara ni Sadsad sa saindang opisina central dapat mag-indefinite leave of absence si Jaucian nganing dai na muna maheling kan mga apektadong estudiantes asin hahagadon na bawion an permit para sa senior high school alagad maagi man giraray sa due process simbagon niya an recomendasyon kun tano ta dai dapat i-revoke an sinambit na permit. Kun paboran ini kan DepEd central office an BCA dai na matatawan nin Government’s Assistance to Students and Teachers in Private Education (GASTPE) o an Senior High School voucher program. Base sa record kan DepEd Bikol an BCA saro sa mga recipeyente nin escuelahan sa Camarines Sur na may halangkaw na allocation hali sa gobierno na nagcacantidad nin P5,96,000 para sa SHS voucher program para sa school year 2017-18.