SA BAGONG BMC BLDG: Kawaran medical equipment sinisigato na ni Bordado sa DOH

September 6, 2018

 

Hinahanapan nin solusyon ni Congresista Gabriel H. Bordado Jr. kan tercer distrito kan Camarines Sur nganing maresolberan na an kawaran nin mga medical equipment kan walong escalon na edificio kan Bicol Medical Center (BMC) matapos saiyang makaulay  sa Camara-Baja si Secretaryo Francisco Duque III dai palang nahahaloy.

Antes kan budget hearing para sa DOH na ginibo sa Camara-Baja kan Lunes, Septiembre 2 sinabi kan congresista na saiyang kinaulay si Sec. Duque na saiyang hinagad na dapat matawan na nin prioridad an kawaran nin mga medical equipment kan bagong BMC Bldg. mala ngani ginibo na si inagurasyon kan world class na edificio kan Abril 27, 2018 alagad sagcod sa ngonian dai man nagiging operational mantang mayo man nin mga kagamitan.

Sa pag-follow up ni Bordado kan problema sa BMC, si Duque nagtalaan nin miting sa sunod na semana sa congresista kan tercer distrito sa main office kaini sa Manila nganing urolayam kun panong mareresolberan asin dapat maging prioridad an kawaran mga ekipahes sa hospital.

An Secretaryo kan DOH kaibanan niya si Undersecretary Nestor Santiago iyo an mga juespe de honor kan gibohon si inagurasyon kan edificio kan Abril 27  na naheling mismo kan duwang mga opisyal kan agencia na tapos na an dakulang edificio kan hospital alagad mayong laog nin mga medical equipment.

Naglalaom an congresista na magkakaigwa nin positibong resulta an pigtalaan nindang urolay mantang mismo an opisyal kan DOH naheling an kamugtakan kan edificio kan sinda maglibot sa bagong edificio.

Si Bordado, kabali sa mga inbitadong  visita sa inagurasyon kan edficio  na naheling niya an kamugtakan sagcod na kinaulay pa si Duque asin Dr. Maria Estrella Litam, jefe kan BMC na saindang  napag-ulayan na dapat matagamahan na nin fondo nganing maseguro na maresolberan na an problema sa mga gamit.

Afuera kan walong escalon na BMC Bldg. igwa pang natapos na limang escalon na ngangaranan na Cancer Bldg. asin an construksyon kan sinambit na mga edificio pinabulosan nin P1.2 bilyones kan panahon ni dating Presidente Benigno Aquino III.

Si dating Juez asin Presidential Adviser for Bicol Affairs Marvel Clavecilla nagsabi na kun padagos na mayong mga medical equipment an pigsasabing world class bldg. kan BMC sa ngonian considerado ining white elephant.

Kuno-kuno na an mga pasyente asin kun maging operational na an mga bagong edificio dakulang bagay sa padagos na nagdadakul na pasyente kan BMC kaya kaipuhan tutokan ini sa DOH na macompleto na an mga gamit kan hospital, sabi pa ni Bordado.                                                                                     (dpa)






 

Share on Facebook
Share on Twitter
Please reload