SA CASURECO II: Pagpalawig sa puesto ki Lalas ibabasura kan NEA

September 6, 2018

 

Si Director Angelino Cornelio Jr. kan Naga North District kan Camarines Sur II Electric Cooperative (Casureco II) nagtutubod na igigilid sana kan National Electrification Administration (NEA) an resolucion kan junta directiva na dai muna halion si Engr. Nelson Lalas komo Project Supervisor/Acting General Manager kan cooperativa sagcod na dai natatapos an pagdakit kan mga electrical post na apektado kan road widening project kan DPWH.
 
Sa walong miembros kan junta directiva kan Casureco II, unikong si Cornelio iyo an dai nagvoto nganing dai muna iimplementar an memorandum ni NEA Administrator Edgardo Masongsong na sagcod na sana  Agosto 15 si Lalas alagad nakahagad pa ini nin extension hasta sa Septiembre 7.

An mga director na grabe pa an pagtubod ki Lalas kinababalihan ninda, Nicanor Oriño kan Magarao District, Ramon Borja kan Bombon District, Gay Pabines kan Milaor District, Domingo Chancoco kan Pili District, Jess Belmoro kan Tinambac-Siruma District asin John Paul Sta Ana kan Calabanga asin pamayo kan junta.

Sinabi kan director kan Naga North District na dificil nang bawion kan NEA an saindang kasugoan na pinapabalik na sa opisina sa Manila an PS/AGM mantang dai na kaipuhan digdi an designadong project supervisor huli ta an Casureco II declarado na kan ahencia bilang triple A electric cooperative.

An satong cooperativa nin electricidad puede nang magtindog sa sadiri asin magbugtak nin Bikolanong general manager na dai na kaipuhan an PS mientras bako naman ining ‘’ailing cooperative’’, sabi pa.

Matapos marecibe kan junta an memorandum kan NEA ki Lalas antes kan Agosto 15 an junta directiva tolos nagpasar nin resolucion na dai na muna paghalion sa Casureco II an PS/AGM envez dapat taposon muna an pagdakit kan mga electric post na ulang sa road widening project kan DPWH.

Si Lalas, natutuyawan kan miembros - consumedores huli kan sa atol aksyon sa relocation kan mga poste kan Casureco II mala ngani yaon pa sana sa banwaan kan Calabanga asin Bombon an patrabajo na dapat natapos na ini kan  Agosto 2018 base sa Joint Memorandum Circular kan DOE asin DPWH.

Si Lalas hinahagadan na nin paliwanag kan Presidential Anti-Corruption Commission (PACC) kun tano ta sagcod sa ngonian dai pa natatapos an pagdakit kan mga poste, alagad pigdadahilan iyo an DPWH mantang sagcod sa ngonian dai pa nakakabayad sa obligasyon sa pagdakit kan mga poste.

Alagad sinabi ni Assistant District Engineer Richard Ragragio kan 2nd Engineering District kan DPWH na andam magbayad an saindang opisina kun igwa nang documento Casureco II na sainda nang na-implementar an relocation kan mga electrical post.

Magiging cuestionable sa COA kun mabayad sinda nin advance sa cooperativa kun dai pa ngani napoponan an pagdakit kan mga poste, sabi pa.

 

Share on Facebook
Share on Twitter
Please reload