Suplay nin NFA rice sa CS kulang pa sa mga mercado

September 6, 2018

 

Pili, Camarines Sur -  Nagaarabotan na si piglalaoman na rinibong sakong suplay nin imported Thailand rice sa National Food Authority sa Camarines Sur hali sa barko sa Puerto kan Ciudad nin Tabaco asin nagseguro na mayong bukbok matapos  kan ginibong ‘fumigation’ asin nag-isyu na nin certificasyon an Bureau of Plant and Industry (BPI) na salbado nang kakanon.

Alagad bako pang suficiente an saindang alokasyon nganing matapos na an halabang pagpirila sa mga mercado kan mga parukyano sa NFA rice na barato an presyo kumpara sa commercial rice.

Huli sa pagkulang-kulang nin stock kan NFA rice sa bodega, limitado pa an saindang alokasyon sa NFA rice retailers sa mga mercado sa Camarines Sur hali sa dating 8 mil na sakong bagas cada semana envez binaba sa 4 mil.

Si Provincial Manager Alexander Perrera nagpahayag sa intrevista kan Bicol Mail na kan nakaaging  semana igwa nag-abot na 1,000 sakong bagas asin nadagdagan pa ini ngonian na semana nin 3,400 na igwa nang labi sa 7,000 na sakong bagas an saindang pinakahuring inventaryo asin nilalaoman magpapadagos pa an pag-abot nganing macompleto an 47 mil na sakong bagas ngonian na bulan.

Igwa nang nagduong na duwang barko sa Puerto kan Ciudad nin Tabaco asin nakatagama digdi sa Camarines Sur  an 41 mil na sakong NFA rice asin igwa pang dugang na 52 mil na sakong bagas. Kun nacompleto na an sinambit na suplay igwa na sindang inventaryo nin abot sa 140 mil na sakong bagas na sagcod na ini sa katapos kan presenteng taon.

An 47 mil na sakong bagas yaon na sa Albay alagad nagkaigwa nin pagkaabala huli ta nag-agi muna sa ‘fumigation’ na nilalaoman matatapos ini sa masunod na semana.

An BPI iyo an tamang ahencia na mag-isyu nin clearance kan gabos na mga pig-aangkat na produkto mantang piglalaoman an 47 mil magiging libredo sa ano man na problema asin salbadong kakanon sagcod na mayo nang reklamo, sabi pa kan NFA CSur.

Sinabi pa kan NFA na sainda nang estrictong pig-iimplementar an Memorandum Circular numerado 137 kan saindang opisina central na prohibido na an pagpabakal nin rinibong sakong bagas sa lokal na gobierno kun mayong calamidad.

Katuyohan kan ahencia nganing dai magkulang an saindang pigsusuplay nin bagas sa mga mercado sa tahaw kan padagos na paglangkaw  sa presyo kan commercial rice.

Digdi sa Camarines Sur nagdadalagan sa P45 hasta P50 an presyo cada kilo kan commercial rice kumpara sa NFA rice na nagcacantidad sana nin treinta y dos pesos.

Nagtutubod pa an NFA Provincial Manager kun pigpipilahan nin mga parabakal bagas an NFA rice huli ta ini barato an presyo asin masiram pa mientras na halangkawon na an presyo kan commercial rice.                  (DPAureus)



 

Share on Facebook
Share on Twitter
Please reload