NCPO andam na sa paz y orden sa Peñafrancia fiesta

Sa tahaw kan isyu sa hotbed sa ilegal na droga asin nagkuriyat na fake news sa tanum droga sa mga motorista, an Naga City Police Office (NCPO) asin an Joint Operation Center (JOC) kan City Hall nagpahayag na kan saindang kaandaman asin asegursyon sa paz y orden sa pagruso kan rinibong mga devotos ni Ina sa pagpasikad kan Peñafrancia fiesta sa paagi kan gigibohon na traslacion procession sa Septiembre 7 hasta fluvial procession sa Septiembre 15. Sa press conference kan JOC, sinabi ni OIC City Director Sr. Supt. Felix Survita Jr. preparado na an saindang labi sa 1,500 na augmentation force kan Philippine National Police hali sa Camp Semion Ola kan Bikol PNP sa Ciudad nin Legaspi asin katuwan ninda an Philippine Army sa irarum kan 9th Infantry Division na may base sa Pili, Camarines Sur nganing magmantenir kan paz y orden sa panahon kan Festividad ni Ina. Trabajo kan augmentation force iyo an pagtao nin seguridad sa rinibong mga devotos ni Ina, mga maarabot na VIPs, road security, traffic asin sa aagihan kan traslacion asin fluvial procession ki Nuestra Señora de Peñafrancia. Sinabi pa kan NCPO na nagbilog pa sinda nin sub task force sa irarum kan Bikol PNP asin madugang pa nin kapupulisan sa apat na mga Police Sub Station na veinte cuatro oras na full alert. Si Rene Gumba, jefe kan Public Safety Office kan City Hall nagsabi na an gabos na comunicasyon i-aapon sa Joint Operation Center sa City Hall na igwang direktang kontak sa gabos na miembros kan JOC na envuelto sa pagtarabangan bako lang sa ngaran na paz y orden envez sa mga insidente orog na kun ini emerhencia, pagresponde kan ambulancia asin iba pang mga serbisyo sa publiko asin mga visita. Sinabi pa kan PSO na igwa na sindang designadong parking area asin re-routing sa bulos kan trafico na apektado kan dalagan sa mga procession ki Ina. An JOC componido nin mga miembros kan awtoridad na envuelto sa pagmantenir kan paz y orden, asin mga ahencias de gobierno, arog kan DOH, BMC, City Health Office, PSO, LTO, Archdiocese of Caceres, grupo civico asin dakul pang organisasyon nganing magtarabangan na maseguro an seguridad sa mga actividades sa Peñafrancia fiesta mantang permi sinda nagkakaigwa nin miting. Pighahalat nalang kan NCPO an pag-aprobar kan Camp Crame sa pagpangalad sa pagsukbit nin armas na dapat iimplementar ngonian na Septiembre 6 hasta 17. An Sanggunian Panlungsod nagpasar nin resolucion na hinahagad ki PNP Chief Director General Oscar Albayalde na magkaigwa digdi nin gun ban sa panahon kan Peñafrancia fiesta na dati nang pig-iimplementar kan PNP sa laog na nin tolong taon nganing maseguro an paz y orden huli ta piglalaoman an maabot sa dos milyon na mga devotos ni Ina hali sa ibang mga ciudades, provincia, maging igwa pang hali sa ibang nasyon. Igwa pang kahagadan an City Hall asin NCPO sa National Telecommunication na liwat iimplementar an signal shut down kan mga telephone companies na saro ini sa ginagamit na paagi kan mararaot na elemento sa pagpasabog nin bomba. Alagad mangyayari sana ini sa mga lugar na aagihan kan traslacion asin fluvial procession ni Nuestra Señora de Peñafrancia asin gigibohon na military parade. (DPAureus)