Dai inako kan Capitolyo, dinara sa City Hall

September 13, 2018

Matapos sayumahan kan Capitolyo Provincial kan Camarines Sur, ipinasa na sa Our Lady of Lord Infirmary Hospital sa Brgy. Carolina, Ciudad nin Naga an mga medical equipment na na-solicit ni Bise Presidente Leni Robredo sa Ancop Foundation Inc. (AFI) sa Estados Unidos sa ginibong simpleng programa sa hospital kan nakaaging Septiembre 7.

Pinangenotan kan bise presidente asin Nathaniel Gomez, representante kan AFI an ceremonya sa pagpasa kan mga medical equipment na pigrecibe ninda Acting Mayor Nelson Legacion, Acting Vice Mayor Cecilia De Asis asin City Health Officer Dr. Vito ‘Butch’’Borja na nagpahayag man nin pasasalamat an opisyales lokal kan ciudad huli kan igwa naman na dagdag  na kagamitan an infirmary hospital.

An mga medical equipment dapat kuta na i-turn over sa haloy nang natapos na edificio kan Infirmary Hospital sa Brgy. Paolbo, Calabanga, Camarines Sur alagad sinayumahan kan Capitolyo Provincial huli kan manlaen-laen na dahilan asin hinahanapan pa nin mga diperensya an edificio ni Dante Jimenez, pamayo kan Presidential Anti-Corruption Commission (PACC).

An Infirmary Hospital sa upper barangay kan Ciudad nin Naga pigdadarahan na nin mga pasyente hali sa mga barangay kan Calabanga mantang igwa na digdi nin tinampo kaya ngani digdi na pigpasa an mga na-solicit na kagamitan sa hospital kan bise presidente.

Pig-osipon ni Robredo an pagdesponer niya nin mga medical equipment para sa hospital sa Calabanga, CSur resulta kan kasundoan sa Technical Working Group na  natukahan  siya  na   iyo  an maghanap kan sinambit na kagamitan mantang sa lado kan Capitolyo Provincial iyo man an engkargado sa operation asin personnel, sa access road nakatuka man ki Congresista Gabriel H. Bordado Jr. kan tercer distrito kan Camarines Sur asin sa lokal na gobierno kan Calabanga iyo man an enkargado sa pagpa-instelar nin linya nin tubig.

An sinambit na kasundoan sa kanya-kanyang ‘‘assignment’’ resulta sa urolay kan TWG kan Noviembre 17, 2017 na ginibo sa laog kan Calabanga Infirmary Hospital na presente sinda VP Robredo, Gobernador Migz Villafuerte, Congresista Bordado, City Health Officer Dr. Vito ‘Butch’ Borja, Alcalde Eduardo Severo, mga opisyales kan Departamento de Salud sa Bicol asin iba pang ahencia na igwang mga kanya-kanyang obligasyon nganing maging operational na an hospital.  

Sa ginibong urolay tinawan siya nin listahan na kaipuhan na mga medical equipment asin bilang engkargado digdi nakua na niya an mga kagamitan sa hospital kan Hunyo asin nagtalaan sinda nin turn-over  sa Capitolyo Provincial kan Hulyo 20 matapos kan saindang duwang veces na miting para sa gigibohon na ceremonya.

Alagad kan magpuli siya kan Hulyo 20 nganing magkaigwa nan in turn over envez  kaini  igwang surat si Provincial Administrator Angel Naval na nagsasabi na dai ninda aakoon sa kun ano-anong dahilan kabali na an pigsasabing nag-iinbestigar pa si PACC Chairman Jimenez kan Calabanga Infirmary Hospital, sabi pa.

‘‘Aram ta man gabos na proyecto na nadara ta sa Ciudad nin Naga asin iba pang banwaan kan tercer distrito kan CSur pigpapa-inbestigaran mayo man sinda nahahanap problema’’

Kaayon sa pighahanap nin deperensya iyo an Fishing Port sa Calabanga, CSur pigpa-inaguraran na ni Jimenez na mayo man nakuang problema, aram kan namamanuan kun panong nadara ni Robredo an proyecto kan siya congresswoman pa kan tercer distrito.

An ibang opisyales lokal naghahapot apesar na proyecto kan bise presidente dai siya inbitado asin iba nang personalidad an nangenotan sa inagurasyon.
                                                              PAKIULAY KI
DANTE JIMENEZ

MAGTABANG DAI MAGPARIBOK

Bilang mga Bikolano, nakiulay si Bise Presidente Robredo ki Chairman Jimenez kan Presidential Anti-Corruption Commission (PACC) na envez magparibok magtabang na sana mantang siya nasa posisyon asin kaalyado kan administrasyon Duterte.

Magtabang na sana, magdara nin proyecto digdi na mapapakinabangan envez na pagpara-atoman si mga nadara kong mga proyecto sa tercer distrito kan Camarines Sur kan ako congresswoman arog kaining mga medical equipment kadakol pa nganing kaipuhan bako lang sa Ciudad nin Naga asin Calabanga, sabi pa kan Bise Presidente.

Si mga espuersos mantang siya yaon sa administrasyon gamiton sa kamarahayan bakong marhay magparapangraot mag-iribahan kita digdi.

Sinabi pa ni Robredo ‘’Kun magpapasikat siya ki Presidente Duterte puede man magpasikat sa marhay na paagi, bako sa pagpapakaraot nin ibang tawo, sakuya lang aram taman kun siisay an nakakatabang digdi.  Igwa pang panahon kadakol panga-ngaipo sa sakuyang advice magtabang na sana’’                             (dpa)








 

Share on Facebook
Share on Twitter
Please reload