MAAGI SA WATER TREATMENT PLANT KAN MNWD: Tubig salog puede nang inumon

September 13, 2018

An Metropolitan Naga Water District (MNWD) pig-aandaman na an posibilidad sa krisis sa tubig inumon sa Ciudad nin Naga asin pagtaraid na mga municipalidad sa masunod na mga taon mala ngani nakatalaan nang magpaconstruhir nin P150 milyones na Surface Water Treatment Plant (SWTP) sa Bicol River sa Sitio Pagdahicon, Brgy. Mabulo, Ciudad nin Naga.

An proyecto masikad an construksyon sa masunod na taon 2019 asin piglalaoman na magiging operational sa 2020 nganing iyo na an consumohon na tubig kan rinibong consumedores kan MNWD na sakop an mga municipalidad kan Canaman, Camaligan, Gainza, Magarao asin sasakopon na an Milaor na nagkakaigwa na sinda nin negosasyon sa lokal na gobierno.

Alagad pigseguro kan manijamiento na magiging malinig an tubig inumon huli ta maagi sa proceso sa bagong gamit teknolohiya na igwa na kaini sa nagkaperang provincia arog kan Bulacan, Quezon asin iba pang lugar.

Sinda Acting General Manager Engr. Virgilio Luansing I asin Board Chairman George Palma kan MNWD nagpaliwanag kan saindang plano sa mga masunod na taon sa irarum kan saindang Flagships Project na kaayon digdi an SWTP, Septic facility namumugtak sa Brgy. Carolina asin Motor pool Water Academy.

An opisyales kan MNWD pig-inbitaran kan SP sa pamamayo ni  Bise Alcalde Nelson Legacion nganing  ipaliwanag sa City Hall an bagong plano nganing maseguro na suficiente an suplay kan tubig sa rinibong service connections sa ciudad maging sa pagtaraid na banwaan.

An presiding officer sulodo man sa amay na ginigibong preparasyon kan MNWD nganing masimbagan an nagdadakul na pangangaipo sa tubig na pigcoconsumo aroaldaw.

Sinabi ni AGM Launsing katuyohan kan SWTP bilang antisipasyon sa padagos na nagdadakul na mga nagcoconsumo nin tubig asin dapat maenot an MNWD nganing preparado an manijamiento sa ano man na posibleng krisis sa tubig kun igwa man.

Huli kan mga bagong teknolohiya sa water treatment na nagsesegurong malinig an tubig inumon dapat pag-andaman kan manijamiento mientras dakul na kaining mga water district an nag-implementar mala ngani iyo na an saindang kinuconsumo aroaldaw, sabi pa kan MNWD.

Pig-osipon pa ni Palma sa provincia nin Bulacan an SWTP nagkukuang suplay nin tubig na igwa nang parong alagad huli kan teknolohia sa water treatment facility bako na ining imposible sa ngonian iyo na ngani an pig-iirinum kan mga consumedores nin tubig sa sinambit na lugar.

Saindang  pigkumpara kan  mga nakaaging  panahon an water district kan ciudad an setenta por ciento kan saindang nakukuang tubig hali sa burabod sa Mt. Isarog kan Brgy. Curry, Pili, Camarines Sur asin an treinta por ciento hali sa saindang mga pumping station alagad sa ngonian baliktad na.

Igwa sindang apat na lugar nin burabod nin tubig duwa hali sa Brgy. Panincuason asin duwa man sa Brgy. Curry, Pili na yaon sa laog kan Mt. Isarog.

Kan taon 2015 an saindang water demand nag-aabot na sa 54,762 asin kan 2017 nagsakat na ini sa 59,262 metro cubico aroaldaw.

Pighahace na kan MNWD na magkaigwa sinda nin Tripartite Agreement entre kan DENR, MNWD asin Local Water Utilities Administration nganing saindang pangenotan an pagtaong proteksyon sa 9 mil na hektaryang watershed sa Mt. Isarog.

Sa ngonian an saindang monthly production nag-aabot sa 1.6 milyon na metro cubicong tubig asin kun marealisar an SWTP, target ninda an cinco mil metro cubicong tubig aroaldaw o cinco milyon litro aroaldaw alagad  pakatapos nin tolong taon ma-upgrade sinda para sa dugang na diez milyon na litrong tubig aroaldaw.

An MNWD nagseserbe na sa 87 mga barangay kaayon na an pagtaraid na municipio kan Ciudad nin Naga asin madudungagang pa ini nin 20 barangay hali sa Milaor, Camarines Sur.

Kan taon 2015 igwa sindang 43,810 na water connections alagad sa ngonian nagsakat na ini sa 49,268 na water connections.

Igwa sindang 27 mga pumping stations alagad oras na maging operational an SWTP papahingaloan muna nganing makatipon naman nin tubig sa irarum kan daga.         (DPAureus)





 

Share on Facebook
Share on Twitter
Please reload