Brgy. Captain gadan, DILG Officer iredo sa aksidente sa vehiculo

DAET, CNORTE - Saro an gadan asin saro man an iredo kan makabongo an saindang piglulunadan na Mitsubishi Montero sport sa puon nin manga sa Barangay Daquit, Labo, Camarines Norte alas 5:00 nin aga kan Septiembre 10. An mga biktima sinda Barangay Capitan Ramon Abano Jr., 46, kan barangay 7 Daet, Camarines Norte na pigdalagan pa hospital alagad binawian man sana nin buhay asin an iredo iyo si Daet DILG Officer Rannel Domasig, 40, kan barangay Gubat, Daet, Camarines Norte iyo an nawalat na naka-confined pa sa Leon Hernandez Hospital mantang an chofer na si Brgy. Capitan Nicanor Paliza, 54, kan Brgy. Pamorangon, Daet, CamNorte, Brgy. Capitan Edwin Ferrer, 48, kan Brgy. 2, Pasig, Daet asin Brgy Capitan Rosito Panotes, 54, kan Brgy. Borabod, Daet naging menor sana si saindang mga lugad asin nagluwas na sa hospital. An Montero sport sadiri kan lokal na gobierno kan Daet, Camarines Norte na iyo an ginamit sa pag-atendir sa sarong actividad alagad kan mapurolian na inabot sinda nin aksidente. Sa investigasyon kan Labo Municipal Police Station an Montero sport na may plakang SKN 212 mientras na nagdadalagan sa Maharlika Highway sakop kan Brgy.Daquit, Labo asin kan masiko na sa kurbadang tinampo biglang nagsabog an guma sa toong enotan kan vehiculo na naging causa na dagos nang nagbudal sa poon nin manga. Resulta kaini nagsapo nin mga lugad an DILG Officer asin naka-confined pa sa Leon Hernandez Hospital.