Sahot na kontrolado nin negociante an alokasyon kan NFA rice, pinahimotikan

Pinahimotikan kan NFA Camarines Sur an nagluwas na bareta na kontrolado kan dakulang negociente nin bagas sa Ciudad nin Naga an NFA rice digdi base sa pahayag ni Albay 2nd District Congressman Joey Sarte Salceda na nagluwas sa isyu kan Bicol Mail kan nakaaging Hulyo 26, 2018. Si NFA Provincial Manager Alexander Perrera nagsabi na imposible an sinambit na alegasyon mantang digdi sa Camarines Sur igwa sindang allocation plan na an saindang suplay naderetso sa mga acredidato nindang rice retailers. An pigsasabing nakaka-deretso sa ‘‘big rice retailers’’ sa Naga dai ko aram kun sain yan hali, anong basehan, sabi pa. Sa mga pahayag ni Salceda sa miembros kan media sa Albay dai man pigdetalye kun siisay na dakulang negociante nin bagas na iyo an nakaka-corner sa mga alokasyon kan NFA rice sa Camarines Sur. Sinabi ni Perrera mawot nindang maaraman kun sairisay an envueltong negociante mantang preparado nindang investigaran asin matawan linaw kun panong nagluwas an news article asin anong basehan. Kan bulan nin Hulyo ngonian na taon nagkukulang an saindang stock nin bagas sa bodega asin limitado an pig-aalocar sa mga NFA rice retailers, panong mangyari an sinambit na isyu. Kan panahon ni NFA Provincial Manager Edna De Guzman, sarong bodega nin dakulang negocianteng bagas sa Ciudad nin Naga sinakyada kan mga elementos kan CIDG sa pamamayo kaidto ni P/Chief Inspector Errol Garchitorena asin nakumpiskar an 500 sakong NFA rice mantang an iba pig-repack na asin pinapabakal sa commercial rice. Nag-aatubang na nin caso an kagrugaring kan bodega asin pendiente na pa sa jusgado sa Ciudad nin Naga perang taon na an asunto mayo pang desisyon an corte. Si Garchitorena langkag na kan caso mala ngani pera nang mga provincia asin Municipal Police Station an saiyang nadestinohan asin sa ngonian nagsakat na ngani an saiyang ranggo sa police superintendent alagad an caso contra sa negociante padagos pang pigbebestahan. Naging cuestionable pa kaidto sa opisyales lokal kan Ciudad nin Naga matapos kan dakulang acomplisimiento kan CIDG Camarines Sur, alagad biglang inapon sa provincia nin Sorsogon si Garchitorena. Si Perrera, dai palang nahahaloy nagtukaw komo provincial manager alagad mayo pang insidente na nadakopan an arin man na negociante na nagsasaray nin sinakong NFA rice. Saiya pang sinabi sa ngonian padagos nang nag-aarabotan an mga Thailand imported rice matapos perang bulang magkulang kulang an saindang stock nin bagas. (DPAureus)