Bagong PD nagcierto mayong sasantohon na politico sa CSur
An bagong magtukaw na provincial director kan PNP Provincial Office kan Camarines Sur nagcierto na mayo siyang kakampihan na politico digdi sa provincia sa tahaw kan nagrarani nang midterm election nurong taon asin an posibleng mainit na laban sa kargong gobernador ninda incumbent Governor Migz Villafuerte asin Congresista Rolando Andaya Jr. kan premir distrito. Nahasa na ko sa mainit na ralaban nin mga politico sa provincia nin Abra kan madestino digdi bilang deputy provincial director, ini an mga pahayag sa media ni Sr. Supt. Reynaldo Pawid, matapos mag-asumir na bagong PD karibay ni Sr. Supt. Jerry Bearis na madedestino na sa Camp Crame. Sinabi pa ni Pawid, mantenido kan Philippine National Police na sinda sarong ‘’a political’’ asin saiyang ipapadagos digdi sa Camarines Sur tanganing maseguro an matuninong na nagdadangadang pirilian lokal sa Mayo 2019. Si Regional Director Chief Supt. Arnel Escobal kan Bikol PNP nagsabi man dapat pabuelohon an mga electorado sa saindang deretso sa pagpili nin mga candidato nganing macierto an paz y orden sa maabot na eleksyon. An bagong jefe kan PPO CamSur na designado sana bilang OIC PD alagad nagtutubod siya na aaboton niya pa digdi an panahon nin eleksyon nurong taon. Nagpatanid pa ini na saiyang estrictong ipapasunod an pagdestino nin mga police personnel bilang security escort nin mga politico base sa pulicia kan Camp Crame na pig-iimplementar kun panahon nin eleksyon. Tatawan man kaini nin prioridad an campaña laban sa ilegal na droga asin maasegurar an dalagan kan paz y orden asin an seguridad sa maabot na pirilian nurong taon. Si Pawid, nag-asumir kan posisyon sa PPO CSur sa ginibong simpleng pagpasa kan comandancia kan Lunes, Septiembre 17 na presente si RD Escobal asin inatendiran kan mga jefe de pulicia hali sa treinta y cincong Municipal Police Station asin Ciudades kan Naga asin Iriga. Antes siyang nadestino digdi sa provincia nagpugol kan posisyon komo Chief Operation for Directorate for Integrated Police Operation sa Southern Luzon alagad antes siyang nadesignar sa sinambit na puesto naging Operation Officer kan Special Action Force. (dpa)