BECA TF “Ompong” yaon na sa Cagayan

September 27, 2018

An Bicol Electric Cooperative Association (BECA) tolos naghiro nganing magbali sa grupo kan Task Force Typhoon ‘’Ompong’’ para matabangan an saindang tugang na cooperativa nin electricidad sa Cagayan na piglamasa kan super typhoon na nagkaigwa nin dakulang destroso sa mga linya nin electricidad  na kaipuhan maibalik sa lalong madaling panahon tanganing maibuelta an suplay nin kuryente.

 

Si General Manager Ana Sylvia Alsisto kan Camarines Sur I Electric Cooperative (Casureco I) asin presidente kan BECA nagsabi an saindang task force naglarga pasiring sa provincia nin Cagayan kan Septiembre 22, 2018 sarabay an saindang grupo na kinababalihan kan Casureco I, II, III asin IV, Camarines Norte Electric Cooperative, asin an duwang cooperativa nin electricidad sa Sorsogong I, II Electric Cooperative (Soreco I, II).

 

An grupo compuesto nin 48 linemen na igwang kanya-kayang supervisors, foremen asin tolong Electrical Engineers nganing magtabang sa ginigibong rehabilitasyon kan mga linya nin electricidad asin maibuelta an suplay nin kuryente.

 

Nakawarak na sinda nin mga destino sa Cagayan II Electric Cooperative (Cagelco 2) particularmente sa harayong banwaan sagcod sa Aparri, sabi pa ni Alsisto.

 

An saindang misyon maglalawig nin duwang semana alagad depende kun igwa pang dapat ipadagos na trabajo.

 

An BECA Task Force ‘’Ompong’’ armado nin mga heavy equipment asin service vehicles na kinababalihan nin boom trucks, closed-van type, line men’s tools and equipment, gasoline, generator set asin igwang food allowance an grupo.

 

An magturogan na mga cooperativa nin electricidad nagtatarabangan kun kaipuhan an saindang serbisyo lalo na si mga apektado   nin  calamidad  para   sa  saindang   restoration asin rehabilitation kan mga linya nin kuryente na piglamasa kan bagyo.

 

An TF ‘’Ompong’’ kan BECA binilog nganing tabangan an saindang tugang na cooperativa nin electricidad na nagtabang man digdi sa rehiyon Bikol matapos maglamasa digdi si bagyong Glenda asin Nina.

   

 

Share on Facebook
Share on Twitter
Please reload