Bed capacity kan BMC gigibohon nang 1,000
An Bicol Medical Center (BMC) iyo na an pinakadakulang hospital kan gobierno sa Bikol magiging nang 1,000 an bed capacity envez kan 500 sana na iyo an pinapasunod kan Department of Health alagad marerealisar ini oras na maaprobaran na an propuestong ley sa congreso na madagdag kan bed capacity kan hospital kabali na an upgrading kan mga service facilities.
Si Congresista Gabriel H. Bordado Jr. kan tercer distrito kan Camarines Sur sa saiyang pigplantiar na ika-185 bill sa Camara-Baja an House Bill No. 8276 – ‘‘An Act increasing the bed capacity of Bicol Medical Center from 500 to 1,000 beds, upgrading the service facilities and professional health care therein, and appropriating funds therefor.’’ nganing madagdagan an capacidad kan BMC mantang igwa man sanang bagong darakulang edificio an hospital na piglalaoman magiging operational sa masunod na taon oras macompleto na an mga medical equipment.
Sa ngonian sa presenteng lomang edificio inaabot nin 800 an mga pasyenteng naglalaog aroaldaw, ini sa kagabsan na bed capacity na dapat 500 sana alagad an 200 na mga pasyente naka-confined sa Don Susano Hospital sa Brgy. Cadlan, Pili, Camarines Sur na sakop kan serbisyo kan BMC.
Tapos na an walong escalon na edificio, afuera pa kaini igwa pang lima asin tolong escalon na edificio na pigfondohan nin P1.2 bilyon kan nagtalikod na administrasyon ni Presidente Benigno Aquino.
Maduwang taon nang tapos an walong escalon na pig-oorgulyo kan DOH na pang world class na an mga dakulang edificio kan hospital alagad an problema sagcod sa ngonian mayo pang mga medical equipment.
Kan Abril 27, 2018 naging bisita si DOH Secretary Francisco Duque sa ginibong inagurasyon kan 8th asin 5th storey bldg. kan hospital alagad dai pa nagiging operational huli kan kawaran nin medical equipment asin partial occupancy permit pa sana an pig-isyu kan Bureau of Fire Protection kan Ciudad nin Naga.
Si Bordado kinaulay na si Duque na dapat matawan na nin prioridad na matagamahan nin fondo para sa mga medical equipment kan hospital.
Afuera pa kaini, saiya pang kinaulay si Dr. Maria Estrella Litam, Medical Director kan hospital nganing matabangan na an kawaran nin mga kagamitan kan hospital huli ta kun padagos na papabayaan magiging white elephant sana an proyecto kan DOH na ginastosan nin P1.2 bilyon.
Si dating Juez asin Presidential Adviser for Bicol Affairs Marvel Clavecilla nagtatabang naman nganing mapadali an paghanap nin solusyon sa kawaran nin mga medical equipment. (DPAureus)