Pasajeros kan train suroksokan aroaldaw

October 4, 2018

Padagos na naghihibog an numero nin pasajeros kan commuter train kan Philippine National Railways (PNR) sa Ciudad nin Naga mantang naglangkaw na an flete sa mga pampasajerong vehiculos epekto kan padagos na pag-ulanto sa presyo kan produkto nin petrolyo.

Prueba kaini, si dating average aroaldaw na veinte cinco mil (P25,000) na ingreso nagsakat na sa treinta y cinco (35,0000) o naglangkaw nin cuarenta por ciento, kun sa sarong bulan nagkakaigwa sinda nin labi sa on milyon pesos.

Si Engr. Jose Florece, Division Manager kan PNR sa Ciudad nin Naga nagsabi na saro sa nakatabang iyo an pagdagdag ninda nin sarong viaje sa dating duwa sana dawa ngani tolo sana an saindang kotse.

Sa paglangkaw kan saindang ingreso dai na naghahagad pa nin subsidia sa saindang opisina sa Manila para sa pansueldo sa saindang empleados asin sa iba pang operating expenses kan lokal na opisina kan perokarril.

Haros perming suroksokan an pasajeros huli ta nagpapalunad pa nin pasajeros an saindang commuter train sa mga barangay sa limitado nindang ruta haling Ciudad nin Naga, pasiring Pamplona, Libmanan asin Sipocot pabuelta sa Naga Station.

Barato an flete sa PNR kun icocompara sa mga pampasajerong jeepney asin van, pighalimbawa kan division manager si viajeng Naga-Libmanan nagcacantidad sanang P22 mantang sa jeepney P40 asin sa van P74.

Kulang an saindang makina asin kotse kaya dai na kayang makaantos sa Ragay asin Del Gallego, Camarines Sur sagcod sa provincia nin Albay,  afuera kan problema sa mga linya kan relis kan perokarril.

An mga regular na pasajeros kan train nagpahayag man na dakulang bagay sa padagos na viaje kan commuter train dawa na sa limitadong  ruta sa mga pagtaraid na banwaan sa tahaw kan inaatubang na halangkaw na inflation rate sa presenting administrasyon ni Duterte.


 

Share on Facebook
Share on Twitter
Please reload