Dagdagan an mga plaza sa Naga, segun ki Joe Perez

October 11, 2018

CIUDAD NIN NAGA ---- Dagdagan an numero nin mga plaza o parke sa laog kan siyudad asin mag-tugdok nin mga children’s playground sa kada barangay.

Ini an pahayag ni Joe Perez sa saiyang pakipag-atubang dae pa lang nahahaloy sa regular na tiripon kan Barangay People’s Organizayion, o BPO, na kun saen siya naimbitaran bilang bisita asin tagapag-taram.

An BPO pinamamayuhan ni Barangay Kagawad asin dating Kapitana kan Concepcion Grande na si Letty Punzalan asin an grupo kumpunido nin mga opisyales na hale sa 27ng barangay kan Naga.

Segun ki Perez, naghihiwas an urbanisasyon, numero kan business districts, asin populasyon kan Naga alagad dai man nadadagdagan an numero kan mga plaza o open space na naka-konsentrar sana man sa centro kan siyudad.

Si Perez saro sa mga aspirante bilang consehal sa irarom kan Team Naga. Siya an editor in chief kan Bicol Mail asin dating nagtrabaho sa Kongreso asin Senado.

Segun ki Perez, na-iintindihan niya na bakong pasil maghanap nin mga bakanteng daga o espasyo para sa proponidong plaza o parke asin playground sa mga barangay, alagad ini pwedeng hanapan paagi kun desidido an gabos, poon sa opisina kan maabot na bagong alkalde, conseho, mga opisyales sa barangay, an private sector, asin lambang Nagueño. And playground o mga equipaje kaini pwedeng ilaag sa laog kan campus o mga pampublikong eskuelahan en caso mayo mananggad makuang bakanteng lugar sa ibang barangay, sabi pa ni Perez.

Importante an plaza sa nag-aasensong siyudad, orog na kun ini tatanuman nin mga kahoy, burak asin mga tinanom, segun ki Perez. An mga kaakian sa barangay nanganga-ipo man ni lugar na makakawatan asin mapapasyaran na harani sa saindang mga harong.

Kun siya si-swertihon na makalaog sa Team Naga, sinabi ni Perez na an siring na kaisipan, sa tabang kan mga barangay officials asin mga konstituente, saiyang itutulod sa konseho asin sa magiging bagong alkalde kan Naga pag-abot kan 2019.                         (DPA)




 

Share on Facebook
Share on Twitter
Please reload