SA CASO KAN MARIANO VS CITY HALL: City Hall liwat nag-MR, naglalaom nin paborableng desisyon sa SC

October 11, 2018

Ibinasura kan Corte Suprema an motion for reconsideration kan lokal na gobierno kan Ciudad nin Naga sa caso na sinangat kan mga irediro kan familia Mariano sa isyu kan propriedad na natitindogan kan City Hall Bldg. asin iba pang mga edificio kabali na an Hall of Justice na yaon sa laog kan cinco hektaryang lote.

Ini kan kinumfirmaran ninda Alcalde John Bongat asin Bise Alcalde Nelson Legacion matapos kan ginibong flag raising ceremony kan Lunes, Oktubre 8 asin sa miembros kan media kasunod kan saindang pagkakarecibe kan kopya kan desisyon hali sa SC na binaba kan Hulyo 2018 alagad narerecibe palang kan City Hall dai palang nahahaloy.

Tolos nakaplantiar sinda kan ika-duwang MR kan Septiembre 28, 2018 sa paagi kan saindang City Legal Officer Atty. Perfecto Bragais III sa pagtubod na tutukaron si ‘‘error’’na nakapalaman sa desisyon nganing matawan nin suficienteng panahon asin maintindihan si mga nakasurat na igwang naheheling na paborableng desisyon para sa lokal na gobierno na iyo an saindang hinahagad.

Si Bise Alcalde Legacion likay na muna magsimbag kan media na matokar kan MR ta tibaad maangotan o ma-contempt sinda kan SC alagad malinaw na igwa sindang suficienteng basehan nganing makua an paborableng desisyon.

Sa desisyon kan first division kan nakaaging Marso 5, 2018 an MR kan lokal na gobierno kan ciudad ibinasura kan CS na nagsasabi na dapat ibakante na kan ciudad an City Hall Complex, kabali an Civic Center asin iba pang mga edificio sagcod pinapabayad  nin arkila. Kun dai mahali bakalon an mga  edificio nin huli ta ining mga edificio pigconstruhir ‘‘in bad faith’’

Sinabi ni Alcalde Bongat an desisyon kan SC mapasakit sa padagos na pag-gobernar kan City Hall.

Kan panahon ni Legacion na iyo pa kaidto an City Legal Officer, kan Noviembre 2013 hinahagad kan mga irediro kan familia Mariano na pahalion an City Hall alagad si desisyon kan Municipal Trial Court pabor sa lokal na gobierno, binaliktad kan Regional Trial Court asin nag-apelar an ciudad sa Corte de Apelacion na kun haen pinaboran an ciudad.

  Nag-apelar sinda sa Corte Suprema asin pinaboran sinda.  Alagad kan Agosto 25, 2006 nakakua man an City Hall nin Temporary Restraining Order sa pinakalangkaw na corte kan nasyon asin binayaan kan dating City Legal Officer na gana an ciudad sa caso asin kan taon 2007, bako na siya an nagkakapot kan caso mantang elihido nang consejal.

An pighuhugotan kan ciudad na basehan legal iyo an deed of donation kan taon 1954 asin ini an saindang piglalaoman na dapat ma-recognisar kan mga Mariano alagad sa desisyon kan first division invalido si donasyon kan lote kan familia Mariano apabor sa City Hall.

An envueltong pigdonar na daga iyo an cinco hektaryang propriedad alagad an sabi kan SC dai valido huli ta si Alcalde kaidto, na si Alcalde Monico Imperial dai soboot nakapirma sa documento kan donasyon na nag-aako kan loteng pigdonar.

Afuera pa kaini, si saro pang maysadiri kan daga na si Jose Jimenez dai man soboot naka-pirma huli kaini, mayong basi an donasyon, kaya an sabi sa resolucion kan SC ibinabasura ninda an MR.

Sa desisyon kan First Division pinapapabayad an City Hall nin bulanan na arkila na cantidad P1.25 milyon poon kan 2003 hasta ngonian na taon na igwang total na P255 milyon.

An envueltong propriedad pigsasabing pig-donar ninda dipuntong Macario Mariano asin Jose Gimenez. Naging ponente kan desisyon iyo si Justice Noel Gimenez Tijam na sarong Bikolano na nag-estar sa Ciudad nin Naga asin nagtapos sa elementarya asin secondarya.

Kun kaidto City Hall sana, ngonian gabos nang mga opisina sa laog kan City Hall Compound asin sa Civic Center an pinapahali base pa sa desisyon.                                                                                     (dpa)






 

Share on Facebook
Share on Twitter
Please reload