SA MAY 13, 2019 ELECTION: Legacion opisyal na candidatong alcalde kan TN

October 11, 2018


Pig-aandaman na kan Team Naga (TN) an saindang sarabay na pagplantiar nin certifico de candidatura sa Commission on Election (Comelec) sa Oktubre 15 matapos kumfirmaron ni Alcalde John Bongat na si Bise Alcalde Nelson Legacion iyo na an opisyal na candidatong  alcalde kan TN kasunod  kan pagsibog na kan ambisyon ni Consejal Cecilia ‘’Nene’’ De Asis na mag-aspirar para alcalde kan ciudad sa maabot na midterm election sa Mayo 13, 2019.

‘’Sa samuyang huring pag-orolay kasubanggi (Oktubre 8) sa pagpili kan mga macandidato sa lindong kan Team Naga, puon alcalde, bise alcalde, sagcod sa mga consejal, pinagmarhay ni Consejal De Asis na dai na mag-aspirar para alcalde kan satuyang ciudad. Huli kaini pinagdesisyonan kan TN, na si Atty. Nelson Legacion na an ‘standard bearer’ kan Partido Liberal. An mga macarandidato sa ibang posisyon iaanunciar matapos an ginigibong proceso’’,  sabi ni Alcalde Bongat.

Sinabi man ni Legacion na saindang piglalaoman matatapos na an consultasyon antes kan Oktubre 15 sa pagpili nin duwang bagohan na candidatong consejal  hali sa natatadang doceng asperante na nagsunad sa proceso mantang si walong mga incumbent na ma-re election kinababalihan ninda Consejales Greg Abonal, Sonny Ranola, Elmer Baldemoro, Mila Raquid-Arroyo, Julian Lavadia Jr., Joselito Del Rosario, Vidal Castillo, asin Salvador Del Castillo.

Si Legacion nagserbe bilang City Legal Officer sa administrasyon ni dipunto Alcalde Jesse Robredo, naka-duwang termino bilang consejal sagcod na nagcandidatong bise alcalde asin nangagana mantang pataposon na an saiyang ika-duwang termino sa Hunyo 2019.

An ambisyon kan bise alcalde na magsakat sa mas halangkaw na posisyon suportado kan Liga ng mga Barangay, mga barangay kagawad, asin iba pang sektores mantang haloy na niyang pig-andaman an laban sa cargong alcalde.

Sa pagpili nin candidatong bise alcalde tinao an bola ki Atty. Legacion kun siisay sa duwang asperante na sinda De Asis asin Consejal Ryan Cydric Rentoy an saiyang pipilion na magiging ka-tandem alagad puede man magconsulta sa mga pag-iriba kun siisay an gusto ninda.

Sa lado ni De Asis na enot nag-aambisyon magcandidatong bise alcalde alagad kan Agosto 18 nagpahayag ini na malaog sa proceso sa nganing mag-candidatong alcalde.

Sa harampangan kan TN kan nakaaging bangui, an consejal nag-atras kan saiyang plano pabor ki Atty. Legacion.

   Saiyang sinabi na an saiyang pagsibog para man sana sa ikakarahay kan gabos sa TN para sa matuninong asin marhay na iribanan sa Sangguniang Panlungsod, opisyales de barangay, suportadores mala ngani nagluluwas na nagkakabaranga na sinda na dai man. Tanganing mahali an mga sahot na baranga na sinda nagdesisyon an consejal na dai na mag-ayon sa selection process sa puestong alcalde.

Saiyang piglinaw na kun nagsibog siya sa plano sa cargong alcalde, mayo man nin ano man na condisyon asin andam siyang magbali giraray sa proceso sa pagpipilian na candidatong bise alcalde.

    
TATO MENDOZA LIWAT MACANDIDATONG ALCALDE

Sa lado ni dating Board President Fortunato “Tato” Mendoza kan MNWD, saiya nang kinumfirmar na liwat siyang macandidatong alcalde asin nag-aandam na sa pagplantiar nin COC alagad dai paman nagbuyagyag kun siisay an saiyang ka-tandem.

Siya dati nang nagcandidatong alcalde sa pirilian lokal kan Mayo 2016 alagad dinaog siya sa resulta kan eleksyon  ni Alcalde Bongat.

Saiyang sinabi na mabugtak sana sinda nin apat  na  candidatong consejal mantang puede magkua sinda nin guest candidate  hali sa Team Naga.                                                                                        (DPA)




 

Share on Facebook
Share on Twitter
Please reload