Tolo magraralaban sa tercer distrito kan CSur

October 11, 2018

Tolo na an magraralaban sa cargong congresista sa tercer distrito kan Camarines Sur kasunod kan kunfirmasyon ni dating alcalde asin congresista Sulpicio ‘’Cho’’ Roco Jr. sa saiyang celebrasyon sa kumpleaño kaini kan Oktubre  9  na  liwat mabuelta sa karawat politica nganing magplantiar kan saiyang certifico de candidatura komo candidatong representante.

Siya iyo an magiging candidato kan administrasyon Duterte sa lindong kan PDP-Laban alagad dai pa piglinaw kun mabugtak siya nin completong mga candidato lokal sa pitong banwaan asin sarong ciudad na sakop kan tercer distrito.

Si incumbent Congressman Gabriel H. Bordado Jr. (LP) nagpahayag na andam siyang mag-re election dawa  siisay maglaban na darakulang politico sa provincia mantang ipinaheling  kaini   an saiyang kakayahan bilang lehislador na nagrerepresentar kan tercer distrito.

Ipinahayag kan saiyang campo paborable sa sarong incumbent na duwa an kalaban mantang completo sinda sa lideres asin makinarya sa mga barangay.

An ika-tolong candidato iyo an pagbubuelta kan veteranong politico kan provincia na si dating gobernador asin congresista Luis R. Villafuerte na enot nang nagpahayag sa entrevista sa media macandidato siya sa lindong kan NPC.

Kan nakaaging eleksyon kan Mayo 2016, dinaog siya sa laban kan nagtutukaw na congresista kan tercer distrito.   Sa opisyal na resulta sa Comelec Camarines Sur si Bordado nakapatos nin 100,127 na voto contra ki LRV nakakua sana nin 81,074 voto  nalamangan   nin 19,053.                        (DPA)



 

Share on Facebook
Share on Twitter
Please reload