CSU kan Capitolyo pigdis-armaran kan chief security ni Cong. Andaya

October 18, 2018

Pili, Camarines Sur –  Sarong naka-sibilyan na miembro kan Civil Security Unit (CSU) kan Capitolyo Provincial kan Camarines Sur mantang armado nin badil mga anom na metros an distancia ki Majority  Floor Leader Rolando Andaya Jr. kan Camara-Baja, risadong iba an hiro-hiro asin posibleng igwang maraot na plano napiritan an chief security asin mga suportadores kan congresista na saindang  arestaron asin dis-armaran katuwang an sarong alcalde kan premirong distrito kan Camarines Sur.
 
Si retiradong Chief Inspector Samuel Alforte, dating jefe de pulicia kan Ragay, Camarines Sur nagsabi na nagduda sinda sa malaen na hiro-hiro kan Civil Security Unit kan Capitolyo na pigmidmid na si Ray John Musa, 26 años kaya dagos na nindang pigtarabangan na mapada sagcod na nakua man ni Alcalde Bobby Matamorosa kan Lupi, Camarines Sur an calibre treinta y ocho na kargado nin mga bala na mayo nin serial number asin dai licenciado.

Sinabi ni Alforte matapos magluwas si Andaya sa opisina Provincial kan Comelec na nagplantiar kan saiyang certifico de candidatura kaibanan an saiyang tugang na si Ms. Maribel Andaya Eusebio, an saiyang esposa na si Marisa Andaya mantang yaon sinda sa vicinidad kan commission narisa ninda na balik-balik si Musa mantang yaon na sa luwas kan opisina si Andaya huli kaini bilang pagtaong seguridad sa majority floor leader napiritan sinda na maggibo nin aksyon.

Nagkaigwa nin commotion sa vicinidad kan Comelec na dagos nang pinalaog  sa vehiculo kan mga alalay ni Andaya an magtugang na Maribel asin Marisa. Presente sa pagplantiar ni COC ni Andaya bilang candidatong gobernador kan NPC iyo an grupo ni Alcalde Madel Alfelor kan Ciudad nin Iriga, Atty. Peachy Alfelor asin an mga Fuentebella sa pangenot kan congressional candidate Arnie Fuentebella sa Partido district.

Sinabi kan majority floor leader na kun igwang planong maraot sa saiya dai na pagdamay an saiyang familia.

‘’Nagkukubog-kubog na an saiyang kalaban sa politica asin nagluluwas igwa nang maraot na plano contra sa saiya’’, sabi pa.

Afuera pa kaini, nagrereclamo pa si Andaya kan sinda na an maplantiar nin COC sa Comelec Camarines Sur na yaon sa laog kan vicinidad kan Capitolyo  Provincial  naging estricto an mga miembros kan CSU mala ngani nagkaigwa pa nin check point na hinaharagadan nin IDs an saiyang mga taohan kun naglalaog an saindang darang vehiculos.

An insidente nangyari mga alas tres nin hapon, Oktubre 16 na tolos man nakaresponde an miembros kan Pili Municipal Police Station na destino sa vicinidad kan Comelec CSur sagcod na dagos nang pigramalan kan mga awtoridad asin piglunad sa Mobile Car nganing darahon asin piglaom sa carcel kan Police Station.

Sa entrevista kan miembros kan media ki Jojo Musa, jefe kan CSU kan Capitolyo Provincial, inako kaini na saiyang kaibanan sa trabajo si Ray John Musa bilang miembro kan CSU alagad saiyang sinabi na mayong armas si Ray John asin kun igwang nakua ‘’planted  sana’’

Maging si Ray John nagpahayag sa media na bako niya an calibre treinta y ocho badil envez ‘‘planted sa saiya kan grupo ni Andaya’’.

Sinabi pa kan jefe kan CSU na dai sinda ‘‘ma-tolerate’’ sa saiyang taohan kun igwang salang ginibo.

Sa Pili Municipal Police Station, matapos kan ginibong investigasyon isasangat na an casong illegal  possession of firearm contra sa nadakop na miembro kan CSU matapos macompleto na ninda an mga documentos.

Sinda Alcalde Bobby Matamorosa  asin   retiradong Chief Inspector Alforte kabali sa nagkaperang testigos asin nagtao nang testimonia sa MPS.                 (DPAureus)



 

Share on Facebook
Share on Twitter
Please reload