Dr. Litam bilang na an aldaw sa BMC

October 18, 2018

Igwa na sanang 18 diyas na natatada sa opisina si Dr. Maria Estrella Litam bilang Medical Director kan Bicol Medical Center (BMC) mantang nakatalaan na siyang ribayan ni Dr. Francisco Sales poon sa Noviembre 4, 2018 kasunod kan pinaluwas na memorandum kan opisina central kan Departamento de Salud asin madedestino na siya sa Manila.

An orden kan DOH narecibe na ninda Litam asin Sales kasunod kan enot na pinaluwas na impormasyon kan Presidential Anti-Corruption Commission (PACC) sa Manila na riribayan na sa puesto an jefe kan BMC.

Saro sa causa kan dahilan kan pagsipa sa puesto sa jefe kan BMC asin ibabalyo sa opisina central huli kan kapabayaan sa pag-monitor kan construksyon kan tolong bagong mga edificio kan hospital na pigponan kan panahon pa kan dating administrasyon ni Presidente Beningo Aquino III.

An mga personajes kan PACC asin Presidential Adviser for Bicol Affairs sa paagi ni dating Juez Marvel Clavecilla nagkapera nang veces nag-inspeksyon sa pigcoconstruhir na mga edificio asin naheling ninda na igwang kaluyahan an liderato ni Litam sa pag-monitor kan proyecto na igwang total na P1.2 bilyones.

An pagdesignar nin bagong pamayo kan BMC bilang pag-andam kan DOH sa operasyon kan 8th asin 5th storey building na sagcod sa ngonian inabot na  nin duwang taon dai pa giraray nagfufuncionar.

Naghihinayang an PACC asin OPAB kan pigsasabing world class building kan hospital alagad dai nagfufuncionar.

Sinabi ni Usec Clavecilla na nagtatabang na an saindang opisina na maging operational an bagong mga edificio nganing makatabang sa nagsusuroksokan nang pasyente mantang haros aroaldaw inaabot nin 800 an pigdadara digdi na kaipuhan pa an dugang na bed capacity.

Sagcod sana sa 500 an  bed capacity kan hospital asin piglalaoman na madugang ini sundo sa 1,000 bed capacity oras na ma-aprobaran an House Bill No. 8276 sa congreso asin ini iyo an ‘’An Act increasing the bed capacity of Bicol Medical Center from 500 to 1,000 beds, upgrading the service facilities and professional health care therein, and appropriating funds therefor.’’

Si Congresista Gabriel H. Bordado Jr. kan tercer distrito kan Camarines Sur iyo an nag-iintruducer kan bill nganing matabangan an mga pasyente na mayong kakayahan magpa-confined sa pribadong hospital.

Afuera kan isyu sa naabalang marhay na construksyon kan bagong mga edificio, mahali sa BMC si Estrella na igwang walat na conflicto sa nagkaperang mga doctor.

An bagong mga edificio piglalaoman kan DOH na magiging operational na sa enot na cuarto kan 2019.(DPAureus)  


 

Share on Facebook
Share on Twitter
Please reload