SA HOUSE BILL 8171: Excise tax ibasura - Bordado

October 18, 2018

Sa paagi nin House Bill nanindugan an People’s Minority (PM) sa Camara-Baja na halion na an kontrobersyal na ‘’anti-poor’’  excise tax sa diesel, kerosene asin iba pang excise fuel taxes sa irarum kan Tax Reform for Acceleration and Inclusion (TRAIN) law.

Si Congresista Gabriel H. Bordado Jr. kan tercer distrito kan Camarines Sur miembro kan People’s Minority  sa Congreso nagpahayag sa entrevista kan Bicol Mail na saiyang sinusuportaran na ibasura na an excise tax huli ta ini saro sa solusyon sa inflation na padagos tinatamaan an kasaraditan na namamanuan Filipino.

Pakatapos sana kan ginibong State of the Nation Address (SONA) ni Presidente Rodrigo Duterte kan Hulyo 2018 an House Bill 8171, na padreno si Marikina Congressman Romero Quimbao hinahagad ninda na ibuelta sa zero an excise taxes sa mga produkto nin petrolyo na pig-iimponer sa lindong kan Acta Republica 1096 o mas midmid sa apod na TRAIN law.

Hinahagad kan PM an tolos-tolos na paghali kan excise tax huli ta base sa pag-aadal sa mga datus nakakadagdag sa inflation alagad nagtutubod an congresista kan tercer distrito kan Camarines Sur sa pigsasabi ni Duterte na nagkakaigwa nin ‘’convergence of factor’’ na nagtulod kan inflation yaon si biglang paglangkaw kan presyo kan produkto nin petrolyo poon sa 40 dollar per barrel abot sa 80 dollar per barrel asin nagtutubod siya si epekto pa kaini huli kan nagkakaigwang trade war.

Afuera kan saindang bill igwa man pigsangat na house bill si Albay Congressman Edcel Lagman na maninigo nang ibasura an kontroversyal na excise tax.

Hinahalat na kan PM an pagtukar kan pigplantiar na HB 8171 sa committee level asin naglalaom sinda  puponan na sa tahaw kan padagos na paglangkaw kan barakalon sa mga mercado nganing madara na sa plenaryo mantang si Presidente Rodrigo Duterte nagpapabor kaini na suspendiron muna an excise tax, sabi pa ni Bordado.

Hinahagad kan PM na halion an buwis sa produkto nin petrolyo alagad bukas sinda sa posibilidad na suspendiron muna mantang an defensa kan Department of Finance (DOF) kaipuhan an dugang na buwis nganing maimplementar an mga proyecto sa infrastractura sa presenting Build-Build-Build Program kan administrasyon Duterte afuera kan iba pang proyecto.

Alagad sinabi pa ni Bordado an nangyayari sa ngonian epekto kan excise taxes nagkakairipit an mga tawo lalo na si inaapod ni Bise Presidente Leni Robredo na yaon sa ‘’laylayon ng lipunan’’,

Nakumfirmar sa mga survey an padagos na piggrereclamo kan namamanuan Filipino iyo an paglangkaw kan mga presyo. An 6.4 percent na inflation rate iyo na an pinakalangkaw matapos kan siyam na taon na kaipuhan nang hanapan nin solusyon kan mga economic managers kan Malacañan.

Sa Senado nagplantiar man nin kaparejong bill na pigsangat ni Senador Paolo Benigno Aquino 1V.

An sektor nin transporte sa rehiyon cinco hinahagad na sa administrasyon Duterte na dapat ibasura na an excise tax na kun haen pigcoconsiderar sana  kan Malacañan an pag-rollback kaini.  Nagrereclamo na an sector na ini huli ta apektado na an saindang pagkayod aroaldaw huli sa haros cada semana sige an lumpat kan presyo sa produkto nin petrolyo.

Alagad an mga lehislador sa congreso nagsabi na an gobierno dai puedeng magpasunod nin rollback sa excise tax na mayong congressional action.     

An TRAIN law nagtutugot sana sa suspension kan fuel tax increase bako an rollback sa tarifa mantang mayo sa probisyon kan ley an para sa i-rollback huli kaini kinakaipuhan an aksyon muna kan congreso.(DPaureus)  





 

Share on Facebook
Share on Twitter
Please reload